महाराष्ट्र २४ ।। विशेष प्रतिनिधी ।। बुधवार दि. १२ मार्च ।। लाडकी बहिण योजनेची मानधनवाढ न करणाऱ्या महायुती सरकारने आनंदाचा शिधा, शिवभोजन थाळी, तीर्थदर्शन योजना या लोकप्रिय योजनांना गुंडाळण्याची तयारी चालविल्याचे स्पष्ट संकेत प्राप्त झाले आहेत. या योजनांसाठी अर्थसंकल्पात निधीची तरतूद करण्यात आली नसल्यामुळे या योजनाच बंद केल्याचा आरोप विरोधकांनी केला आहे. मात्र कोणतीही योजना बंद केलेली नाही असा दावा करत सत्ताधाऱ्यांनी विरोधकांचा आरोप खोडून काढला आहे. सध्या राज्यावर गंभीर आर्थिक संकट असून ४५ हजार कोटींची महसूली तूट निर्माण झाली आहे. तसेच राज्यावरील कर्ज ९ लाख ३२ हजार कोटींवर पोहोचणार आहे.
आनंदाचा शिधाच्या माध्यमातून रेशनकार्डधारकांना एक किलो रवा, एक किलो साखर, एक किलो चना डाळ आणि एक लिटर पामतेल दिले जात होते. या योजनेच्या माध्यमातून दसरा, दिवाळी, गुढीपाडवा, आंबेडकर जयंती अशा सणांच्या निमित्ताने फक्त १०० रुपयांमध्ये पाच वस्तू दिल्या जायच्या. ही योजना आता बंद करण्यात आल्याचे चित्र आहे.
शिवभोजन थाळीला २६७ कोटींची गरज
२०२० साली कोराना काळात गरीब आणि गरजू लोकांसाठी ‘शिवभोजन’ थाळी योजना राबविण्याचा निर्णय उध्दव ठाकरे सरकारने घेतला होता. ही योजना नंतर महायुती सरकारनेही सुरू ठेवली. शहरी भागासाठी प्रति थाळी शिवभोजनाची किंमत ५० रुपये आणि ग्रामीण भागासाठी ३५ रुपये असेल. गरीब आणि गरजू व्यक्तींना मात्र १० रुपयात ही थाळी मिळते. भुकेलेल्यांना वेळेवर दोन घास मिळतात ही समाधानाची बाब आहे. शिवभोजनच्या दररोज २ लाख थाळींसाठी वार्षिक २६७ कोटी खर्च येतो. शासनाच्या दृष्टीने भुकेलेल्यांच्या पोटासाठी २६७ कोटी हा खर्च तसा नगण्य आहे. त्यामुळे ही योजना पूर्ववत सुरू ठेवावी अशी मागणी माजी अन्न व नागरी पुरवठा मंत्री छगन भुजबळ यांनी गेल्या महिन्यात एका पत्राव्दारे केली होती.
किसान सन्मान योजनेत वाढ नाही
महाराष्ट्र सरकारने प्रधानमंत्री किसान सन्मान योजनेंतर्गत पात्र शेतकऱ्यांच्या उत्पन्नास जोड देण्यासाठी दिल्या जाणाऱ्या रकमेत वाढ करावी या हेतूने नमो शेतकरी महासन्मान निधी योजना सुरु केली आहे. यातून एका वर्षात शेतकऱ्यांना सहा हजार रुपये दिले जातात. पीएम किसान सन्मान निधी योजनेतून शेतकऱ्यांना सहा हजार रूपये मिळतात. म्हणजेच सध्या शेतकऱ्यांना एका वर्षात १२ हजार रुपये मिळतात. नमो शेतकरी महासन्मान निधी योजनेच्या रकमेत तीन हजार रुपयांची वाढ करणार असल्याचे मुख्यमंत्री देवेंद्र फडणवीस यांनी जाहीर केले होते. त्यामुळे शेतकऱ्यांना एकूण १५ हजार मिळणार हे स्पष्ट झाले होते. मात्र अर्थसंकल्पात ही वाढीव तरतूद करण्यात आलीच नाही.
शिंदेंच्याच योजना बंद : वडेट्टीवार
एकनाथ शिंदे मुख्यमंत्री असताना लाडकी बहिण, अन्नपूर्णा योजना, तीर्थाटन योजना आनंदाचा शिधा अशा योजना आणल्या होत्या. लाडकी बहिण योजनांमुळे महायुतीला भरभरून मत मिळाले पण तिला २१०० रुपये सरकार आता देत नाही. इतर योजनांचाही साधा उल्लेख अर्थसंकल्पात नाही. या योजना बंद होणार का? याचे उत्तर अर्थमंत्र्यांनी द्यावे, अशी मागणी काँग्रेस विधिमंडळ पक्षाचे नेते विजय वडेट्टीवार यांनी केली.