महाराष्ट्र २४ ।। विशेष प्रतिनिधी ।। शुक्रवार दि. १४ मार्च ।। तमिळनाडूमध्ये त्रिभाषा सूत्रावरून वाद सुरू असताना, तसेच मतदारसंघांच्या पुनर्रचनेच्या मुद्द्यावरून केंद्र सरकारशी दोन हात करण्याची तयार करणाऱ्या द्रमुक सरकारने केंद्राविरुद्ध नवा प्रतीकात्मक पवित्रा घेतला आहे. आता रुपयाच्या चिन्हावर वार केला आहे. यंदाच्या राज्य अर्थसंकल्पात रुपयाच्या राष्ट्रीय चिन्हाऐवजी तमिळ अक्षराचा वापर असलेल्या चिन्हाला स्थान दिले आहे.
तमिळनाडूचे अर्थमंत्री थंगम थेन्नारासू शुक्रवारी अर्थसंकल्प सादर करणार आहेत. या पार्श्वभूमीवर तमिळनाडूने हे नवे चिन्ह गुरुवारी जारी केले. यात ‘रुबाई’ या तमिळ शब्दाचे पहिले अक्षर ‘रु’ दर्शविले आहे. ते स्थानिक भाषेत भारतीय चलन दर्शवते. त्यावर ‘सर्वांसाठी सर्व काही’ असे लिहिले आहे. अर्थसंकल्पात सरकारचे सर्वसमावेशक मॉडेल असल्याचा द्रमुकचा दावा आहे
द्रमुकच्या या कृतीवर भाजपने टीका केली आहे. भाजपचे तमिळनाडूचे प्रदेशाध्यक्ष के. अन्नामलाई, भाजपच्या ज्येष्ठ नेत्या आणि माजी प्रदेशाध्यक्ष तमिलिसाई सुंदरराजन यांनीही द्रमुकवर टीका केली. तमिळनाडूचे मुख्यमंत्री स्टॅलिन आणि राज्य सरकारच्या वागणुकीबद्दल आम्हाला खेद वाटतो, अशी प्रतिक्रिया त्यांनी व्यक्त केली. भाजप वगळता राज्यातील सत्ताधारी द्रमुक आणि इतर प्रमुख राजकीय पक्ष केंद्र सरकारने हिंदी लादल्याचा आरोप करीत आहेत.
पुनर्रचनाप्रश्नीच्या बैठकीसाठी तेलंगणला निमंत्रण
तमिळनाडूतील सत्ताधारी द्रमुकच्या एका शिष्टमंडळाने गुरुवारी तेलंगणचे मुख्यमंत्री रेवंत रेड्डी यांची भेट घेतली. तमिळनाडूचे मुख्यमंत्री एम. के. स्टॅलिन २२ मार्च रोजी चेन्नईत मतदारसंघाच्या पुनर्रचनेसंदर्भात बैठक घेत आहेत. रेड्डी यांना या बैठकीचे निमंत्रण देण्यात आले. द्रमुकच्या खासदार कनिमोळी, राज्यमंत्री के. एन. नेहरू आणि माजी केंद्रीय मंत्री ए. राजा यांनी रेवंत रेड्डी यांची नवी दिल्लीत भेट घेतली. ‘या बैठकीला उपस्थित राहण्याची तयारी आहे. पक्षश्रेष्ठींशी चर्चा करून अंतिम निर्णय घेईल’, असे रेड्डी यांनी सांगितले. भाजपचे पुनर्रचना धोरण हे दक्षिणेतील राज्यांविरोधातील कट आहे, अशी टीकाही त्यांनी पत्रकारांशी बोलताना केली. चेन्नईतील बैठकीपूर्वी तेलंगण सरकार या विषयावर सर्वपक्षीय बैठक घेणार आहे.
रुपयाचे चिन्ह तमिळ व्यक्तीचेच
डॉलर आणि युरोच्या धर्तीवर भारतीय रुपयाचे चिन्ह तयार करण्यात आले होते. या अधिकृत चिन्हाचे डिझाइन तयार करणारे उदयकुमार धर्मलिंगम हे तमिळ आहेत. त्यांचा जन्म तमिळनाडूमधील कल्लाकुरिची येथे झाला. ते तमिळनाडूची राजधानी चेन्नई येथे वास्तव्यास आहेत. रुपयाचे चिन्ह तयार करण्यासाठी २०१० मध्ये देशपातळीवर स्पर्धा घेण्यात आली होती. या स्पर्धेत उदयकुमार यांच्या चिन्हाने बाजी मारली होती. त्यानंतर रिझर्व्ह बँकेसह केंद्र सरकारने रुपयाचे हे चिन्ह भारतीय चलनाचा अधिकृत लोगो म्हणून वापरण्यास मान्यता दिली. धर्मलिंगम हे आयआयटी गुवाहाटीमध्ये प्राध्यापक आहेत. त्यांचे वडील एन. धर्मलिंगम हे द्रमुकचे आमदार होते.