महाराष्ट्र २४ ।। विशेष प्रतिनिधी ।। दि. ०६ ऑगस्ट ।। मुंबई, ठाणे, रायगड ते अगदी रत्नागिरीपर्यंत मागील काही दिवस पावसानं चांगलीच उसंत घेतल्यामुळं तापमानाच वाढ झाल्याचं पाहायला मिळालं. राज्यात घाटमाथा आणि विदर्भ वगळचा उर्वरित भागांमध्ये पावसाच्या हलक्या सरींनीच हजेरी लावली होती. आता मात्र हाच पाऊस पुन्हा एकदा हवामान प्रणालीत झालेल्या बदलांमुळं पुन्हा एकदा राज्याच्या काही भागांमध्ये जोर धरताना दिसत असून, परिणामस्वरुप मध्य महाराष्ट्र आणि मराठवाड्यात तुरळक ठिकाणी पावसाच्या मध्यम ते मसुळधार सरींची हजेरी असेल असा अंदाज वर्तवण्यात आला आहे.
हवामान प्रणालीत कसे बदल होत आहेत?
मान्सूनच्या वाऱ्याचा वेग कमी झाल्या कारणानं राज्यात पावसाचं प्रमाण कमी झालं. मात्र आता मध्यपूर्व अरबी समुद्रापासून पूर्व- पश्चिमेकडे हवेचा कमी दाबाचा पट्टा सक्रिय असून, त्यामुळं राज्याच्या काही भागांवर पावसाळी ढगांचं सावट स्पष्टपणे पाहायला मिळत आहे.
हवामान विभागानं वर्तवलेल्या अंदाजानुसार, कोकणातीव दक्षिणेकडे असणाऱ्या जिल्ह्यांसह मध्य महाराष्ट्राच्या उत्तरेकडे मेघगर्जना आणि विजांच्या कडकडाटासह पावसाची हजेरी असेल. ज्यादरम्यान वाऱ्याचा वेग वाढून ताशी 30 ते 40 किमी इतका असेल. तर, दक्षिण मध्य महाराष्ट्रापासून ते अगदी मराठवाडा आणि गोव्यापर्यंतसुद्धा वादळी पावसाची हजेरी पाहायला मिळेल असं हवामान विभागानं स्पष्ट केलं आहे.
पुढील 24 तासांमध्ये राज्याच्या सिंधुदुर्ग, अहिल्यानगर, सातारा, सांगली, पुणे, सोलापूर, कोल्हापूर, धाराशीव, परभणी, हिंगोली, नांदेड, अकोला, भंडारा, गोंदिया इथं विजांच्या कडक़डाटासह पावसाची हजेरी असेल असं सांगत हवामान विभागानं या भागांसाठी पावसाचा यलो अलर्ट जारी केला आहे. तर कोकणात पावसाचा जोर काही अंशी वाढेल असाही प्राथमिक अंदाज हवामान विभागानं वर्तवला आहे.
तूर्तास देशाच्या उत्तरेकडील पावसाचा आणि तत्सम हवामान स्थितीचा महाराष्ट्रावर थेट परिणाम दिसून येत नसला तरीही मध्य भारतातील राज्यांपर्यंत मात्र या नैसर्गिक बदलांचा परिणाम दिसून येत असून तिथं मात्र पावसाचा जोर वाढल्याचं स्पष्ट होत आहे.