महाराष्ट्र 24 | विशेष प्रतिनिधी | दि. ११ | मुंबई–पुणे प्रवास म्हणजे पूर्वी ‘सहनशक्तीची परीक्षा’. एक्सप्रेसवेवर गाडी की पार्किंग, हे कळायचंच नाही. पण आता चित्र बदलतंय. खाली रस्त्यावर वाहनं रांगतायत आणि वर आकाशात हेलिकॉप्टर उडतायत. अवघ्या ३० मिनिटांत मुंबई ते पुणे! ऐकायला स्वप्नासारखं वाटतं, पण पुण्यात सध्या हे वास्तव आहे. इतकंच नाही तर पुण्यात अचानक हेलिकॉप्टर बुकिंग फुल्ल झालंय. प्रश्न असा की, ही चैन कोणाची? आणि इतक्या घाईने कोण कुठे चाललंय? उत्तर ऐकलंत तर — “देश खाली चाललाय आणि नेते वरून उडतायत!”
मुंबई आणि पुणे यांच्यातलं १५५ किलोमीटरचं अंतर कापायला रस्त्याने ४–५ तास लागतात. पण हेलिकॉप्टरने हा प्रवास फक्त अर्ध्या तासात. म्हणूनच पुण्यात १२ पेक्षा जास्त खाजगी कंपन्या हेलिकॉप्टर सेवा देतायत. पर्यटक, उद्योगपती, हौशी श्रीमंत मंडळी — सगळेच आकाशमार्गे फिरताना दिसतायत. कुणासाठी ही मजा, कुणासाठी वेळेची बचत. खर्चही तसाच — २० हजारांपासून थेट ५ लाखांपर्यंत! सामान्य माणूस अजूनही टोल नाक्यावर उभा आहे आणि वरून हेलिकॉप्टर जाताना पाहून विचार करतोय, “हे आपल्या देशातच चाललंय ना?”
पण या अचानक वाढलेल्या डिमांडमागे खरी गोष्ट वेगळीच आहे — निवडणुका. पुणे सध्या राजकीय केंद्रबिंदू झालंय. सभा, प्रचार, बैठका… नेत्यांना वेळ नाही, आणि रस्त्यांवर संयम नाही. म्हणूनच हेलिकॉप्टर हा नवा प्रचाररथ बनलाय. मुंबईच नव्हे तर नाशिक, सांगली, छत्रपती संभाजीनगर, विदर्भ, मराठवाडा — महाराष्ट्राच्या कानाकोपऱ्यात जाण्यासाठी हेलिकॉप्टरची बुकिंग होत आहेत. पुण्याबाहेरून येणारे नेते थेट आकाशातून सभास्थळी अवतरतायत. जणू मतं मागायला जमिनीवर उतरण्याआधी आकाशातून दर्शन देण्याची नवी पद्धत सुरू झाली आहे.
हेलिकॉप्टर सेवा देणाऱ्या कंपन्यांच्या मते, पुण्यात दिवसाला १२ पेक्षा जास्त हेलिकॉप्टर बुकिंग होत आहेत. म्हणजे आकाशातही ‘हाय-प्रोफाइल ट्रॅफिक’ सुरू आहे. — “लोकशाहीत मतदार रस्त्यावर चालतो, आणि नेता आकाशातून फिरतो!” प्रश्न हेलिकॉप्टरचा नाही, प्रश्न दरीचा आहे — जमिनीवरचा सामान्य माणूस आणि आकाशातला वेळ वाचवणारा नेता. मुंबई–पुणे ३० मिनिटांत होत असेल, तर छानच आहे. पण एक दिवस असा येईल का, की हा वेग फक्त नेत्यांसाठी नाही, तर सामान्य माणसासाठीही असेल? तोपर्यंत, एक्सप्रेसवेवर हॉर्न वाजवत आपण फक्त वर बघायचं… आणि उडणाऱ्या राजकारणाचा आवाज ऐकायचा!