महाराष्ट्र 24 | विशेष प्रतिनिधी | दि. २३ जानेवारी | महाराष्ट्रात गेल्या काही दिवसांपासून हवामानाचा मूड सतत बदलताना दिसत आहे. किमान तापमानात वाढ झाल्याने हिवाळ्याची थंडी ओसरली असून उकाड्याची जाणीव नागरिकांना होऊ लागली आहे. राज्यातील अनेक भागांत अंशतः ढगाळ वातावरण पाहायला मिळत असून सकाळच्या वेळी दाट धुके आणि रात्री दमट हवामान जाणवत आहे. या बदलत्या स्थितीमुळे नागरिकांचा दैनंदिन दिनक्रम विस्कळीत झाला असून हवामान विभागाने आज, २३ जानेवारी रोजी, राज्यातील काही भागांत पावसाची शक्यता वर्तवली आहे.
हवामान विभागाच्या ताज्या अंदाजानुसार आज राज्यातील तापमानात चढ-उतार कायम राहणार आहेत. सकाळी काही भागांत गारठा जाणवेल, तर दुपारनंतर उन्हाचा कडाका वाढण्याची शक्यता आहे. विशेष म्हणजे पालघर, धुळे, नंदूरबार, जळगाव, नाशिक आणि अहिल्यानगर या सहा जिल्ह्यांमध्ये ढगाळ हवामानासह हलक्या ते मध्यम स्वरूपाच्या पावसाचा इशारा देण्यात आला आहे. त्यामुळे या भागांतील नागरिकांनी आणि शेतकऱ्यांनी खबरदारी घेण्याचे आवाहन करण्यात आले आहे.
गेल्या दोन दिवसांपासून किमान तापमानात झालेली वाढ आजही कायम राहण्याची शक्यता असून पुढील दोन दिवस तापमानात आणखी चढ-उतार दिसू शकतात, असा अंदाज हवामान विभागाने व्यक्त केला आहे. धुळे, नाशिक आणि निफाड या भागांत किमान तापमान १० अंशांच्या वर गेल्याने थंडीचा प्रभाव कमी झाला आहे. परिणामी, सकाळी गारवा आणि दुपारी उकाडा अशी मिश्र स्थिती निर्माण झाली आहे, जी नागरिकांच्या आरोग्यासाठी चिंतेची बाब ठरत आहे.
तापमानातील सततच्या बदलांमुळे सर्दी, ताप, अंगदुखी यांसारख्या आजारांमध्ये वाढ होत असल्याचे चित्र आहे. विशेषतः लहान मुले, ज्येष्ठ नागरिक आणि आजारग्रस्त व्यक्तींना अधिक त्रास सहन करावा लागत आहे. दुसरीकडे, या बदलत्या हवामानाचा फटका शेतकरी वर्गालाही बसत असून पिकांच्या वाढीवर त्याचा विपरीत परिणाम होत आहे. अचानक पाऊस आणि तापमानातील चढ-उतार यामुळे शेतीचे नियोजन कोलमडण्याची भीती शेतकऱ्यांकडून व्यक्त केली जात आहे. त्यामुळे पुढील काही दिवस हवामानाकडे बारकाईने लक्ष ठेवण्याची गरज निर्माण झाली आहे.