Gold Silver Market : 💰 सोनं उतरलं, चांदी घसरली; बाजाराला दिलासा, गुंतवणूकदार संभ्रमात

महाराष्ट्र 24 | विशेष प्रतिनिधी | दि. ८ फेब्रुवारी २०२६ || Gold and silver rates today India : जागतिक राजकारणात थोडी शांतता नांदू लागली आणि त्याच क्षणी सोन्या-चांदीच्या दरांनी मान खाली घातली. मागील काही महिन्यांपासून ‘सुरक्षित गुंतवणूक’ म्हणून डोळ्यांत मिरवणारे सोने आणि चांदी अखेर खाली उतरले आहेत. MCX वर सोन्याचा दर प्रति १० ग्रॅम १ लाख ५२ हजार ३०० रुपयांवर स्थिरावलेला दिसला, तर व्यवहारादरम्यान दरात चढ-उतार होऊन तो १ लाख ४८ हजार ८८९ रुपयांपर्यंत खाली आला. दुसरीकडे चांदीने तर जरा जास्तच घसरण दाखवली. प्रति किलो २ लाख ३९ हजार ३९३ रुपयांपर्यंत चांदीचा दर खाली येताच बाजारात ‘आता काय?’ असा प्रश्न घुमू लागला. काही दिवसांपूर्वी ज्या दरांकडे पाहून सामान्य ग्राहक घामाघूम होत होता, तेच दर आता किंचित दिलासा देणारे ठरत आहेत.

ही घसरण केवळ आकड्यांची नाही, तर मानसिकतेचीही आहे. इंडियन बुलियन अँड ज्वेलर्स असोसिएशननुसार २४ कॅरेट सोन्याचा दर १ लाख ५१ हजार ४८९ रुपये नोंदवण्यात आला असून चांदीचा दर २ लाख ४१ हजार १८४ रुपये प्रति किलोवर पोहोचला आहे. जागतिक पातळीवर इराण-अमेरिका चर्चांना सकारात्मक सूर लागल्याने भू-राजकीय तणाव कमी झाल्याचे संकेत मिळाले आणि ‘धोका म्हणजे सोने’ हे जुने समीकरण तात्पुरते बाजूला सरकले. परिणामी गुंतवणूकदारांनी हात आखडते घेतले. सुरक्षिततेच्या शोधात सोन्याकडे धाव घेणारी पावले थांबली आणि बाजाराने थोडा श्वास घेतला. चांदीच्या बाबतीत तर विक्रीचा दबाव इतका वाढला की जागतिक बाजार भांडवलात ती तिसऱ्या क्रमांकावर घसरली.

दरम्यान, अमेरिकेतील रोजगार बाजाराची कमकुवत आकडेवारीही या घसरणीला कारणीभूत ठरली आहे. जानेवारीत नोकरी कपातींची संख्या १.०८ लाखांवर गेल्याने व्याजदर कपातीची शक्यता बळावली आहे. तज्ज्ञांच्या मते पुढील काळात सोनं १.४० ते १.६० लाख रुपये प्रति १० ग्रॅम, तर चांदी २.२५ ते २.८५ लाख रुपये प्रति किलो या दरमर्यादेत फिरताना दिसू शकते. त्यामुळे “घसरणीवर खरेदी आणि वाढीवर विक्री” हीच शहाणी चाल ठरेल, असा सल्ला दिला जात आहे. थोडक्यात काय, सोनं-चांदी आज खाली आली असली तरी बाजार अजून शांत बसलेला नाही; कारण इथे शांतता ही नेहमीच तात्पुरती असते.