Ladki Bahin Yojana: 💸 खातं कोरडंच… पण आशा जिवंत! लाडकीच्या ₹३०००चा प्रश्न; दोन महिन्यांचा हप्ता एकत्र येणार?

महाराष्ट्र 24 | विशेष प्रतिनिधी | दि. ८ फेब्रुवारी २०२६ || जानेवारी संपला, फेब्रुवारीचाही पहिला आठवडा उलटला; पण लाडकी बहिणीच्या खात्यात अपेक्षित रक्कम अजूनही पोहोचलेली नाही. राज्य सरकारच्या महत्त्वाकांक्षी ‘लाडकी बहीण’ योजनेअंतर्गत दरमहा मिळणाऱ्या आर्थिक मदतीची महिलांना प्रतीक्षा लागली आहे. जानेवारीचा हप्ता अद्याप जमा न झाल्याने आता फेब्रुवारीचाही हप्ता रखडतोय की काय, अशी चिंता महिलांमध्ये व्यक्त होत आहे. या पार्श्वभूमीवर, जानेवारी आणि फेब्रुवारीचा हप्ता एकत्र म्हणजेच थेट ₹३००० जमा होण्याची शक्यता असल्याच्या चर्चा सुरू झाल्या आहेत. मात्र, याबाबत अधिकृत घोषणा न झाल्याने संभ्रम कायम आहे.

जिल्हा परिषद निवडणुकीआधी जानेवारीचा हप्ता महिलांच्या खात्यात जमा होईल, असे संकेत दिले जात होते. मात्र, मतदान पार पडून निकालाच्या चर्चांना वेग आला असतानाही लाभार्थी महिलांच्या खात्यात रक्कम जमा झालेली नाही. त्यामुळे ग्रामीण आणि शहरी भागातील महिलांमध्ये नाराजी वाढताना दिसत आहे. अनेक महिलांसाठी ही रक्कम घरखर्च, औषधोपचार, मुलांचे शिक्षण किंवा दैनंदिन गरजांसाठी महत्त्वाची असल्याने हप्ता रखडल्याचा थेट परिणाम त्यांच्या आर्थिक नियोजनावर होत आहे. आता निवडणुकीनंतरच दोन्ही हप्ते एकत्र जमा होतील, अशी शक्यता व्यक्त केली जात असून कधीही ₹३००० थेट खात्यात जमा होऊ शकतात, असा अंदाज वर्तवला जात आहे.

दरम्यान, काही महिलांचा लाभ थांबण्यामागे केवायसीतील त्रुटी हे एक मोठे कारण समोर आले आहे. अर्ज भरताना चुकीची माहिती, प्रश्नांची अचूक उत्तरे न देणे किंवा कागदपत्रांमधील विसंगती यामुळे अनेक लाभार्थी योजनेपासून तात्पुरते वंचित राहिल्या आहेत. ही अडचण लक्षात घेऊन संबंधित यंत्रणेकडून ई-केवायसी दुरुस्तीसाठी ३१ मार्चपर्यंत मुदतवाढ देण्यात आली आहे. योग्य दुरुस्ती केल्यानंतर प्रलंबित हप्त्यांचा लाभ मिळण्याचा मार्ग मोकळा होणार आहे. त्यामुळे महिलांनी घाई न करता आपली केवायसी तपासून आवश्यक दुरुस्ती करण्याचे आवाहन करण्यात येत आहे. आता प्रश्न एकच आहे—लाडकीच्या खात्यात दिलासा कधी येणार? उत्तर मात्र येत्या काही दिवसांतच मिळण्याची शक्यता आहे.