✍️ महाराष्ट्र २४ | विशेष प्रतिनिधी | दि. २० फेब्रुवारी २०२६ | What are the Gold-Silver Rates Today: मुंबई : 20 फेब्रुवारी 2026 रोजी कमॉडिटी बाजार उघडताच सोनं-चांदीच्या दरांनी पुन्हा एकदा उसळी घेत गुंतवणूकदारांचे लक्ष वेधले. मल्टी कमॉडिटी एक्स्चेंज अर्थात Multi Commodity Exchange of India (MCX) वर चांदीच्या दरात तब्बल सुमारे 2,500 रुपयांची वाढ होत ती 2,43,850 रुपये प्रति किलोवर पोहोचली. मागील सत्रात 2,41,393 रुपयांवर बंद झालेली 5 मार्च डिलीवरीची चांदी आज 2,43,874 रुपयांवर खुली झाली. सकाळी 9.05 वाजता ती 1.02 टक्क्यांच्या वाढीसह व्यवहार करत होती. दुसरीकडे 2 एप्रिल डिलीवरीसाठीचे सोने 1,54,819 रुपयांवरून उसळी घेत 1,55,105 रुपयांवर उघडले आणि सुरुवातीच्या सत्रात 1,55,384 रुपयांपर्यंत पोहोचले. सकाळी 9.10 वाजता सोने 0.30 टक्क्यांच्या वाढीसह 1,55,277 रुपये प्रति 10 ग्रॅमवर व्यवहार करत होते.
आंतरराष्ट्रीय बाजारातही मौल्यवान धातूंमध्ये सौम्य तेजी दिसून आली. दिल्ली सर्राफा बाजारात चांदीने 2.6 लाख रुपये प्रति किलोचा टप्पा गाठला, तर 99.9 टक्के शुद्ध सोने 1,58,650 रुपये प्रति 10 ग्रॅमवर पोहोचले. जागतिक घडामोडी, विशेषतः अमेरिका-इराण तणावाच्या पार्श्वभूमीवर सुरक्षित गुंतवणुकीची मागणी वाढल्याचा परिणाम भावांवर दिसून येत आहे. बुधवारीच चांदीने 2,46,000 रुपयांवरून झेप घेत 2,64,000 रुपयांचा स्तर गाठला होता. सोन्यानेही 1,950 रुपयांची वाढ नोंदवत गुंतवणूकदारांना आकर्षित केले.
बाजार तज्ज्ञांच्या मते, जागतिक अनिश्चितता, डॉलरमधील हालचाल आणि देशांतर्गत लग्नसराईचा हंगाम यामुळे सोनं-चांदीच्या मागणीत वाढ झाली आहे. काल रात्री भावात झालेल्या किरकोळ घसरणीनंतर आज सकाळी गुंतवणूकदारांनी खालच्या पातळीवर खरेदी केल्याने तेजीला बळ मिळाले. मात्र बाजारातील चढ-उतार लक्षात घेता खरेदीपूर्वी स्थानिक सराफा बाजारातील हॉलमार्क दरांची खात्री करणे आवश्यक आहे. अस्थिर बाजारात संयम आणि माहितीपूर्ण निर्णय हेच सुरक्षित गुंतवणुकीचे खरे मंत्र ठरतात.