✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ५ एप्रिल २०२६ ।। IPL 2026 मध्ये यंदा वेगाचं वादळ उठलं आहे—आणि त्या वादळाचं नाव आहे अशोक शर्मा! अहमदाबादच्या नरेंद्र मोदी स्टेडियम वर गुजरात टायटन्स विरुद्ध राजस्थान रॉयल्स सामन्यात या तरुण गोलंदाजाने ताशी १५४.२ किमी वेगाने चेंडू टाकत प्रेक्षकांना अक्षरशः थक्क करून सोडलं. आयपीएलच्या यंदाच्या हंगामातील हा सर्वात वेगवान चेंडू ठरला असून, या वेगाने त्याने दक्षिण आफ्रिकेच्या वेगवान गोलंदाज एनरिक नॉर्खिया चा रेकॉर्डही मागे टाकला. दुसऱ्याच सामन्यात अशी कामगिरी करत अशोकने स्वतःचं नाव स्पीडस्टारच्या यादीत कोरलं आहे.
राजस्थानमध्ये जन्मलेला हा २३ वर्षीय गोलंदाज गेल्या काही वर्षांपासून विविध फ्रँचायझींच्या रडारवर होता. कोलकाता नाईट रायडर्स ने २०२२ मध्ये त्याच्यावर बोली लावली होती, पण पदार्पणाची संधी मिळाली नाही. २०२५ मध्ये नेट बॉलर म्हणून राजस्थान रॉयल्स सोबत अनुभव घेतल्यानंतर अखेर २०२६ मध्ये त्याचं नशीब उजळलं. आशिष नेहरा यांच्या विश्वासावर गुजरात टायटन्स ने ९० लाखांत त्याला संघात घेतलं—आणि त्यानेही संधीचं सोनं केलं. पंजाबविरुद्ध पदार्पणात विकेट घेऊन लक्ष वेधून घेतलेल्या अशोकने आता वेगाने सगळ्यांना प्रभावित केलं आहे.
यंदाच्या हंगामातील वेगवान गोलंदाजांच्या यादीत अशोक शर्मा अव्वल स्थानावर आहे. त्याच्या मागे एनरिक नॉर्खिया (१५०.९ किमी/ता), कार्तिक त्यागी (१४९.७ किमी/ता), कगिसो रबाडा (१४९.१ किमी/ता) आणि जेमी ओव्हर्टन (१४५.६ किमी/ता) यांचा समावेश आहे. पण या सगळ्यांवर मात करत अशोकने दाखवून दिलंय—भारतातील वेगवान गोलंदाजीचा नवा चेहरा आता तयार झाला आहे. हा वेग फक्त आकडा नाही, तर भारतीय क्रिकेटच्या नव्या पिढीचा दमदार इशारा आहे!