✍️ महाराष्ट्र २४ ।। ऑनलाईन ।। विशेष प्रतिनिधी ।। दि. १२ एप्रिल २०२६ ।। देशभरात हवामानाचा तडाखा वाढताना दिसतोय—एका बाजूला १३ राज्यांमध्ये वादळी वाऱ्यासह पावसाचा इशारा, तर दुसरीकडे महाराष्ट्रात उन्हाने कहर! India Meteorological Department ने दिलेल्या अंदाजानुसार हिमालयीन पट्ट्यातील हिमाचल प्रदेश, उत्तराखंड आणि जम्मू-काश्मीर तसेच ईशान्येकडील राज्यांमध्ये जोरदार पावसासह ताशी ५०-६० किमी वेगाने वारे वाहण्याची शक्यता आहे. काही ठिकाणी विजांच्या कडकडाटासह गारपीट होण्याचाही धोका असल्याने शेतकऱ्यांना सतर्कतेचा इशारा देण्यात आला आहे.
महाराष्ट्रात मात्र चित्र पूर्णपणे वेगळं आहे. मुंबई, पुणे आणि ठाणे या शहरांमध्ये तापमान २-३ अंशांनी वाढण्याची शक्यता असून उकाडा अधिक तीव्र होणार आहे. राज्यात अनेक ठिकाणी तापमान ४० अंशांच्या पुढे गेलं असून उष्णतेची लाट जाणवते आहे. काल अकोला येथे ४०.१°C इतकं उच्चांकी तापमान नोंदवलं गेलं, तर सोलापूर आणि गडचिरोली येथेही पारा ४० अंशांवर पोहोचला.
आज कोकणात हवामान कोरडं राहणार असलं तरी उकाडा कायम राहणार आहे. सातारा, सांगली, कोल्हापूर आणि पुणे या भागांत अंगाची लाहीलाही करणारी उष्णता जाणवणार आहे. पुढील २-३ दिवसांत तापमान आणखी वाढण्याचा अंदाज असून काही ठिकाणी ४० अंशांचा टप्पा ओलांडण्याची शक्यता आहे. एकीकडे देशात वादळ-पावसाचा इशारा, तर महाराष्ट्रात उन्हाचा तडाखा—हवामानाचा हा ‘डबल अटॅक’ नागरिकांसाठी मोठं आव्हान ठरत आहे!