महाराष्ट्र २४ ।। ऑनलाईन ।। विशेष प्रतिनिधी ।। दि. ०७ मे २०२६ ।। महागड्या वैद्यकीय तपासण्यांमुळे त्रस्त असलेल्या पुणेकरांसाठी महापालिकेने मोठा दिलासा दिला आहे. शहरातील चार प्रमुख महापालिका रुग्णालयांमध्ये आता सीटी स्कॅन आणि एमआरआय तपासण्या खासगी रुग्णालयांच्या तुलनेत कमी दरात उपलब्ध करून देण्यात आल्या आहेत. काही दिवसांपूर्वी एमआरआय यंत्रणा बंद पडल्याच्या तक्रारींमुळे रुग्णांना अडचणींचा सामना करावा लागत होता; मात्र आता सर्व सेवा पुन्हा सुरळीत सुरू करण्यात आल्या आहेत. त्यामुळे कमी खर्चात अचूक वैद्यकीय तपासणीची सुविधा मिळाल्याने सामान्य नागरिकांना मोठा आधार मिळत आहे.
कोथरूडमधील सुतार रुग्णालय, मंगळवार पेठेतील कमला नेहरू रुग्णालय, येरवड्यातील राजीव गांधी रुग्णालय आणि पद्मावती येथील पोटे दवाखाना येथे या सुविधा उपलब्ध आहेत. पीपीपी तत्त्वावर सुरू करण्यात आलेल्या या सेवांचे दर केंद्रीय सरकारी आरोग्य योजनेपेक्षा पाच ते दहा टक्के कमी ठेवण्यात आले आहेत. खासगी रुग्णालयांत सीटी स्कॅनसाठी दोन ते तीन हजार रुपये, तर एमआरआयसाठी पाच ते सात हजार रुपयांपर्यंत खर्च येतो. त्यामुळे महापालिकेच्या रुग्णालयांमधील कमी दरातील सुविधा अनेक रुग्णांसाठी आर्थिक दिलासा ठरत आहेत.
दररोज प्रत्येक केंद्रावर साधारण १५ ते २० रुग्णांची तपासणी केली जात असल्याची माहिती आरोग्य विभागाकडून देण्यात आली आहे. आधुनिक यंत्रणेमुळे आजारांचे अधिक अचूक निदान करणे शक्य होत असल्याचा दावा प्रशासनाने केला आहे. मात्र, आर्थिकदृष्ट्या दुर्बल रुग्णांसाठी या तपासण्या पूर्णपणे मोफत उपलब्ध करून द्याव्यात, अशी मागणीही आता नागरिकांकडून जोर धरू लागली आहे. वाढत्या आरोग्यखर्चाच्या काळात पुणे महापालिकेची ही योजना सर्वसामान्यांसाठी दिलासादायक पाऊल मानली जात आहे.