महाराष्ट्र २४ ।। ऑनलाईन ।। विशेष प्रतिनिधी ।। दि. १८ मे २०२६ ।। सह्याद्रीच्या कड्याकपाऱ्यांतून वर्षानुवर्षे धापा टाकत जाणाऱ्या प्रवाशांना आता दिलासा मिळणार आहे. रत्नागिरीच्या खेडमधून महाबळेश्वरकडे जाणारा रस्ता म्हणजे आतापर्यंत निसर्गरम्य असला, तरी जीवघेण्या वळणांचा आणि तासन्तास कासवगतीने सरकणाऱ्या प्रवासाचा नमुना होता. पण आता सरकारने उभारलेला भलामोठा केबल स्टेड पूल कोकण आणि पश्चिम महाराष्ट्र यांच्यातील अंतर अक्षरशः गिळून टाकणार आहे. तब्बल पन्नास किलोमीटरचा फेरा कमी होणार म्हटल्यावर कोकणवासीयांच्या चेहऱ्यावरचा आनंद ओसंडून वाहणाऱ्या कोयनेपेक्षाही मोठा दिसतो आहे. मुंबईच्या वरळी सी-लिंकची आठवण करून देणारा हा पूल तापोळा ते गाढवली दरम्यान उभा ठाकला असून, सह्याद्रीच्या कुशीत आधुनिकतेची जणू लोखंडी सही उमटली आहे.
१७५ कोटी रुपयांचा हा प्रकल्प फक्त पूल नाही; तो विकासाच्या गप्पा मारणाऱ्यांना प्रत्यक्ष कामाचे उत्तर आहे. ५४० मीटर लांबीचा आणि १४ मीटर रुंदीचा हा पूल पाहताना एखाद्या चित्रपटातील दृश्य पाहत असल्याचा भास होतो. पुलाच्या मध्यभागी तब्बल ४३ मीटर उंच व्ह्यू गॅलरी उभारण्यात आली आहे. पर्यटकांनी वर जाऊन कोयनेच्या पाण्यावर पसरलेला धुक्याचा गालिचा पाहावा आणि “वा रे महाराष्ट्र!” अशी आरोळी ठोकावी, अशीच ती रचना आहे. त्यासाठी कॅप्सुल लिफ्टची सुविधाही देण्यात आली आहे. म्हणजे आता सहलीला गेलेले पर्यटक फोटो काढताना स्वतःलाच दुबईत आल्याचा गैरसमज करून घेतील! पावसाळ्यानंतर हा पूल वाहतुकीसाठी खुला होणार असून, स्थानिक व्यापारी, पर्यटन व्यवसाय आणि शेतकऱ्यांसाठी ही जीवनवाहिनी ठरणार आहे.
या पुलामागे राजकारणाची कहाणीही कमी रंगतदार नाही. शिवसेना-भाजप युतीच्या काळात मनोहर जोशी मुख्यमंत्री असताना या पुलाची कल्पना कागदावर आली; पण सरकारी फाईल म्हणजे लग्नाच्या बोहल्यावर उभा राहून वर पळून जावा तशी अवस्था झाली होती. अखेर एकनाथ शिंदे मुख्यमंत्री झाल्यानंतर या कामाला वेग आला आणि आता पूल प्रत्यक्ष उभा राहिला आहे. एवढ्यावरच सरकार थांबलेले नाही. बामणोली ते आपटी आणि दरे गावाला जोडणारा आणखी ३०० कोटींचा पूलही आकार घेत आहे. पावसाळ्यात जीव मुठीत धरून बार्जने प्रवास करणाऱ्या नागरिकांसाठी हा बदल म्हणजे अक्षरशः नवजीवन आहे. सह्याद्रीच्या डोंगरदऱ्यांत आता फक्त धुकंच नाही, तर विकासाचं नवीन पहाटकिरणही दिसू लागलं आहे.