महाराष्ट्र २४ ।। ऑनलाईन ।। विशेष प्रतिनिधी ।। दि. १८ मे २०२६ ।। Devendra Fadnavis : “पुढच्या तीन-चार वर्षांत पुण्याचा चेहरामोहरा पूर्ण बदललेला दिसेल,” असा शब्द देत मुख्यमंत्री Devendra Fadnavis यांनी पुणेकरांच्या अपेक्षांना मोठी झेप दिली आहे. विकासकामांच्या भूमिपूजन सोहळ्यात बोलताना त्यांनी पुण्याला आधुनिक, गतिमान आणि जागतिक दर्जाचे शहर बनवण्याचा रोडमॅपच मांडला. वाहतूक कोंडी, रखडलेले रस्ते, पाणीटंचाई आणि आरोग्य सुविधांच्या प्रश्नांनी त्रस्त झालेल्या पुणेकरांसाठी ही घोषणा म्हणजे जणू आश्वासनांचा पाऊसच ठरला. अंडरग्राउंड मेट्रो, नवे उड्डाणपूल, समान पाणीपुरवठा योजना आणि आधुनिक आरोग्य सुविधा यामुळे पुण्याचा वेग आणि विकास दोन्ही वाढणार असल्याचे फडणवीस यांनी स्पष्ट केले. “वाहतूक कोंडी कमी करून पुण्याला वेगाने पुढे न्यायचं आहे,” असे सांगताना त्यांनी पुण्याला महाराष्ट्राचे ‘फ्युचर सिटी’ बनवण्याचा निर्धार व्यक्त केला.
या विकास आराखड्यात आरोग्य क्षेत्रालाही मोठे स्थान देण्यात आले आहे. देशातील पहिले पीपीपी तत्त्वावरील कॅन्सर हॉस्पिटल पुण्यात उभारले जात असून, सामान्य नागरिकांना सीजीएचएस दरात अत्याधुनिक उपचार उपलब्ध करून देण्याचा सरकारचा प्रयत्न आहे. “कॅन्सर वेगाने वाढतोय आणि त्यावरील उपचार परवडत नाहीत; त्यामुळे हे हॉस्पिटल सामान्यांसाठी वरदान ठरेल,” असे मुख्यमंत्री म्हणाले. त्याचबरोबर छत्रपती संभाजी महाराजांचे देशातील सर्वात उंच शिल्प उभारले जात असल्याची माहितीही त्यांनी दिली. विशेष म्हणजे हे शिल्प फक्त स्मारक नसेल, तर संभाजी महाराजांच्या विद्वत्तेचे प्रतीक असेल. “वयाच्या चौदाव्या वर्षी ग्रंथ लिहिणारा राजा जगात विरळाच,” असे सांगत फडणवीस यांनी संभाजी महाराजांच्या व्यक्तिमत्त्वाचा गौरव केला. इतिहास, विकास आणि आधुनिकतेचा संगम घडवण्याचा प्रयत्न सरकार करत असल्याचे त्यांच्या भाषणातून स्पष्ट दिसून आले.
मुंढवा येथील महत्त्वाच्या पुलाचे भूमिपूजन, कात्रज-कोंढवा रस्त्याचा वेग, १२ गावांच्या पाणीपुरवठ्यासाठी मंजूर झालेले ८९० कोटी आणि रखडलेल्या योजनांना मिळालेली चालना यामुळे पुण्याच्या विकासाला आता नवे इंजिन मिळाल्याचे चित्र आहे. फडणवीस यांनी अधिकाऱ्यांनाही थेट इशारा देत “उरलेली कामे लवकर पूर्ण करा, दोन महिन्यांनी आढावा घेऊ,” असे सुनावले. पुण्यातील पाणीगळती, विस्कळीत पुरवठा आणि रखडलेले प्रकल्प यांचा उल्लेख करत त्यांनी गेल्या अनेक वर्षांच्या अडचणींचा पाढाच वाचला. पण त्याचवेळी “पाण्याचा थेंब न थेंब वाचवायचा आहे,” हा संदेशही दिला. आता पुणेकरांच्या मनात एकच प्रश्न आहे — ही आश्वासने प्रत्यक्षात किती वेगाने उतरतात? मात्र एवढे नक्की, की मुख्यमंत्रीांनी पुण्यातून केलेल्या या घोषणांमुळे शहराच्या भविष्यासंदर्भात मोठी उत्सुकता निर्माण झाली आहे.