महाराष्ट्र २४ ।। ऑनलाईन ।। विशेष प्रतिनिधी ।। दि. १९ मे २०२६ ।। Iran civilian weapons training news : मध्यपूर्वेच्या वाळवंटात पुन्हा एकदा युद्धाचे ढग दाटून आले आहेत आणि इराणने आता “आम्ही झुकणार नाही” अशी उघड गर्जना करत जगालाच इशारा दिला आहे. अमेरिकेचे माजी राष्ट्राध्यक्ष Donald Trump यांच्या कठोर भूमिकेनंतर इराणच्या इस्लामी सरकारने थेट सामान्य नागरिकांनाच युद्धाच्या मैदानात उतरवण्याची तयारी सुरू केल्याचे चित्र समोर आले आहे. “प्रत्येक हाती शस्त्र” या मोहिमेखाली लहान मुलांपासून वृद्धांपर्यंत सर्वांना AK-47 चालवण्याचे प्रशिक्षण दिले जात असल्याच्या बातम्यांनी आंतरराष्ट्रीय पातळीवर खळबळ उडाली आहे. कालपर्यंत घराच्या अंगणात खेळणाऱ्या मुलांच्या हातात आता बंदुका दिसू लागल्या असून, इराणने युद्ध केवळ सैन्यापुरते मर्यादित ठेवलेले नाही, तर ते जनतेच्या नसानसांत उतरवण्याचा प्रयत्न सुरू केला आहे. सोशल मीडियावर व्हायरल झालेल्या एका व्हिडिओमध्ये इराणी टीव्ही वाहिनीवरील निवेदक संयुक्त अरब अमिरातीच्या ध्वजावर गोळीबार करताना दिसला आणि त्यानंतर संपूर्ण जगाचे लक्ष पुन्हा तेहरानकडे वळले.
इराणच्या राजधानी Tehranसह अनेक शहरांमध्ये रात्री उशिरापर्यंत मोठ्या सभा घेतल्या जात आहेत. या सभांमध्ये “अमेरिकेचा नाश होवो” अशा घोषणा देत नागरिकांना बंदुका चालवण्याचे प्रशिक्षण दिले जात असल्याची माहिती समोर येत आहे. विशेष म्हणजे तरुण मुलींनाही AK-47 हाताळण्याचे प्रशिक्षण दिले जात असल्याचे वृत्त आहे. एका प्रत्यक्षदर्शीच्या म्हणण्यानुसार, चेहऱ्यावर मुखवटा घातलेला प्रशिक्षक महिलांना बंदूक उघडणे, पुन्हा जोडणे आणि गोळीबार करण्याचे धडे देत होता. युद्धाच्या तयारीचा हा नवा चेहरा जगाला अधिक अस्वस्थ करणारा ठरत आहे. दुसरीकडे, इराणी सरकारी माध्यमांवरील दृश्यांनीही वातावरण अधिक तापवले आहे. एका थेट कार्यक्रमात इस्लामिक रिव्होल्युशनरी गार्ड कॉर्प्सच्या जवानाकडून प्रशिक्षण घेतल्यानंतर निवेदकाने थेट स्टुडिओत गोळीबार केल्याची घटना चर्चेचा विषय ठरली आहे. युद्धाची भाषा आता फक्त सीमांवर नाही, तर टीव्हीच्या पडद्यावर आणि नागरिकांच्या हातात उतरली आहे.
या साऱ्या घडामोडींमागे अमेरिका-इराण संघर्षाचे वाढते सावट असल्याचे मानले जात आहे. युद्धबंदी जाहीर होऊनही दोन्ही देशांमध्ये कोणताही ठोस करार झालेला नाही. अमेरिका आपल्या अटींवर ठाम आहे, तर इराणही माघार घेण्यास तयार नसल्याचे स्पष्ट दिसत आहे. ‘हॉर्मुझ सामुद्रधुनी’वरील तणाव, समृद्ध युरेनियमचा प्रश्न आणि मध्यपूर्वेतील वाढती अस्थिरता यामुळे परिस्थिती अधिक गंभीर बनली आहे. NATO मित्रराष्ट्रांकडून अपेक्षित साथ न मिळाल्याने अमेरिकेलाही काही पावले मागे घ्यावी लागल्याची चर्चा आहे. पण इराणने मात्र दशकांपासूनची भीती झुगारून अमेरिकेच्या दबावासमोर न झुकण्याची भूमिका घेतली आहे. परिणामी, आता हा संघर्ष केवळ दोन देशांमधील राहिलेला नसून संपूर्ण जगाच्या अर्थकारणावर आणि सुरक्षेवर परिणाम करणारा ठरू शकतो. मध्यपूर्वेच्या रणभूमीतून उठणारा हा धूर जगाला आणखी एका मोठ्या संकटाची चाहूल देत असल्याची भीती व्यक्त केली जात आहे.