महाराष्ट्र २४ ।। ऑनलाईन ।। विशेष प्रतिनिधी ।। दि. १९ मे २०२६ ।। Iran civilian weapons training news : कोरोनाच्या जखमा अजून पूर्ण भरलेल्या नाहीत आणि जगाच्या दारात आता इबोलाने पुन्हा टकटक सुरू केली आहे. जागतिक आरोग्य संघटनेने World Health Organization ‘सार्वजनिक आरोग्य आणीबाणी’ घोषित करताच अनेक देशांच्या आरोग्य यंत्रणांची धावपळ सुरू झाली आहे. काँगो आणि Ugandaमध्ये ३०० हून अधिक संशयित रुग्ण आणि तब्बल ८८ मृत्यूंची नोंद झाल्यानंतर परिस्थिती गंभीर बनली आहे. विशेष म्हणजे काँगोची राजधानी Kinshasa येथे प्रयोगशाळेत पुष्टी झालेला रुग्ण आढळल्याने चिंता अधिक वाढली आहे. कारण संसर्गाचे मुख्य केंद्र असलेला ‘इटुरी’ प्रांत या शहरापासून तब्बल हजार किलोमीटर दूर आहे. म्हणजे विषाणू आता सीमांच्या चौकटी ओलांडू लागल्याची भीती व्यक्त होत आहे. कोरोना काळात मास्क, सॅनिटायझर आणि लॉकडाऊनने हैराण झालेल्या जगाला आता “पुन्हा तेच दिवस येणार का?” हा प्रश्न सतावू लागला आहे.
मात्र WHO ने स्पष्ट शब्दांत सांगितले आहे की, भीतीपोटी सीमा बंद करणे किंवा प्रवासावर निर्बंध आणणे हा उपाय नाही. उलट त्यामुळे लोक चोरट्या मार्गाने प्रवास करतात आणि रोग नियंत्रण आणखी कठीण होते. या निर्बंधांचा स्थानिक अर्थव्यवस्थेवरही गंभीर परिणाम होऊ शकतो, असा इशाराही देण्यात आला आहे. भारतातही या घडामोडींवर बारीक नजर ठेवली जात असून National Centre for Disease Control परिस्थितीचे सातत्याने निरीक्षण करत आहे. आरोग्य मंत्रालयाने स्पष्ट केले आहे की, २०१४ मध्ये एका आंतरराष्ट्रीय प्रवाशामध्ये इबोलाची लागण आढळल्याचा अपवाद वगळता भारतात आजवर एकही रुग्ण सापडलेला नाही. त्यामुळे सध्या घाबरण्याची गरज नसली तरी सावध राहणे अत्यंत आवश्यक आहे. कोरोनाने जगाला शिकवलेली सर्वात मोठी गोष्ट म्हणजे “उशिरा जागे होण्यापेक्षा आधीच खबरदारी घेणे अधिक महत्त्वाचे!”
All India Institute of Medical Sciencesचे माजी संचालक Dr. Randeep Guleria यांनीही नागरिकांना धीर देत महत्त्वाची माहिती दिली आहे. त्यांच्या मते, इबोला हा कोविडसारखा हवेतून झपाट्याने पसरणारा विषाणू नाही. संक्रमित व्यक्तीच्या रक्त, उलट्या, स्राव किंवा दूषित वस्तूंच्या थेट संपर्कातून हा आजार पसरतो. त्यामुळे अत्यंत जवळचा शारीरिक संपर्क नसल्यास संसर्गाचा धोका कमी असतो. २०१४ मधील प्रादुर्भावावेळी भारताने विमानतळांवर तपासणी मोहीम, विलगीकरण केंद्रे आणि आरोग्य कार्यशाळा राबवत परिस्थिती नियंत्रणात ठेवली होती. सिएरा लिओनहून आलेल्या एका भारतीय प्रवाशाला तीन महिने विलगीकरणात ठेवण्यात आले होते; पण त्यानंतर संसर्गाचा एकही मोठा प्रसार झाला नव्हता. त्यामुळे इबोलाचे सावट गंभीर असले तरी परिस्थिती कोरोनासारखी बेकाबू होण्याची शक्यता अत्यंत कमी असल्याचे तज्ज्ञांचे मत आहे. मात्र, जगभरातील वाढत्या प्रवासामुळे विमानतळ तपासणी, लक्षणांवर लक्ष आणि तातडीचे निदान हीच आता भारतासाठी खरी ढाल ठरणार आहे.