‘स्वतः पाणी प्या, दुसऱ्यालाही द्या’; प्राण्यांसाठीही पाण्याची व्यवस्था करण्याचे पंतप्रधानांचे आवाहन
महाराष्ट्र २४ ।। ऑनलाईन ।। विशेष प्रतिनिधी ।। दि. २८ मे २०२६ ।। देशभर उन्हाने अक्षरशः धुमाकूळ घातला आहे. रस्ते तापलेत, शहरं भाजून निघतायत आणि दुपारच्या उन्हात बाहेर पडणं म्हणजे अंगावर ज्वाळा ओतल्यासारखी परिस्थिती निर्माण झाली आहे. अनेक राज्यांत तापमानाचा पारा ४५ ते ४७ अंशांच्या घरात पोहोचला असून नागरिक हैराण झाले आहेत. या भयावह उष्णतेच्या पार्श्वभूमीवर पंतप्रधान नरेंद्र मोदी यांनी देशवासियांना थेट सोशल मीडियातून भावनिक आणि महत्त्वाचं आवाहन केलं आहे. “स्वतः पाणी प्या, दुसऱ्यालाही पाणी द्या,” असा साधा पण काळाच्या गरजेचा संदेश देत मोदींनी नागरिकांना सावध राहण्याचं आवाहन केलं. उष्णतेची ही लाट आता केवळ हवामानाची बातमी राहिलेली नाही; तर ती थेट जनजीवनाला भिडणारी आपत्ती ठरू लागली आहे.
पंतप्रधानांनी आपल्या संदेशात केवळ स्वतःची काळजी घेण्यापुरतं मर्यादित न राहता समाजातील संवेदनशीलता जपण्याचं आवाहन केलं. “तहानलेल्या व्यक्तीला एक ग्लास पाणी द्या,” असं सांगताना त्यांनी रस्त्यावरून जाणाऱ्या नागरिकांसाठी घराबाहेर, दुकानासमोर किंवा चौकात पाण्याची भांडी ठेवणाऱ्यांचं विशेष कौतुक केलं. एवढंच नव्हे, तर पक्षी आणि जनावरांसाठीही पाण्याची व्यवस्था करण्याचा संदेश त्यांनी दिला. आजच्या धावपळीच्या जगात माणूस स्वतःच्याच जीवासाठी धावत असताना, मोदींनी माणुसकीचा हा साधा धडा पुन्हा एकदा देशासमोर ठेवला आहे. कारण उष्णतेचा हा कहर केवळ माणसांनाच नव्हे, तर मुक्या जीवांनाही होरपळून काढत आहे.
मोदींनी नागरिकांना आरोग्याबाबतही स्पष्ट इशारा दिला आहे. चक्कर येणं, थकवा जाणवणं किंवा अचानक अशक्तपणा येणं याकडे दुर्लक्ष करू नका, असं त्यांनी बजावलं. जर एखादी व्यक्ती उन्हामुळे अस्वस्थ झाली, तर तिला तातडीने सावलीत न्यावं, पाणी किंवा ओआरएस द्यावं, असा सल्लाही त्यांनी दिला. आज अनेक शहरांमध्ये उष्माघाताच्या घटनांमध्ये वाढ होत असल्याने प्रशासनही सतर्क झालं आहे. रुग्णालयांमध्ये उष्णतेशी संबंधित तक्रारी वाढताना दिसत आहेत. डॉक्टरांच्या मते, शरीरातील पाण्याची कमतरता ही अनेक गंभीर आजारांना निमंत्रण देऊ शकते. त्यामुळे “पाणी म्हणजेच प्राण” ही म्हण आता अक्षरशः खरी ठरत आहे.
या सगळ्यात मोदींच्या संदेशातील सर्वात भावनिक भाग ठरला तो म्हणजे ज्येष्ठांची काळजी घेण्याचं आवाहन. “आई-वडील, आजी-आजोबांना फोन करा, त्यांची विचारपूस करा,” असं सांगताना त्यांनी कुटुंबातील नात्यांनाही स्पर्श केला. दुपारच्या उन्हात बाहेर पडू नका, पुरेसं पाणी प्या आणि विश्रांती घ्या, असा सल्ला देत त्यांनी देशवासियांना सतर्क राहण्याचं आवाहन केलं. कारण सध्या देशासमोरचं खरं संकट हे राजकारणाचं नाही, तर वाढत्या तापमानाचं आहे. आणि म्हणूनच या उन्हाच्या रणरणत्या काळात एक ग्लास पाणी आणि थोडी माणुसकीच सर्वात मोठा दिलासा ठरत आहे.