शिवराज्याभिषेक सोहळ्याला लाखोंची गर्दी; वाहतूक कोंडी टाळण्यासाठी प्रशासनाची मोठी खबरदारी
महाराष्ट्र २४ ।। विशेष प्रतिनिधी ।। दि. ४ जून २०२६ ।। रायगडाच्या पवित्र भूमीवर दरवर्षीप्रमाणे यंदाही शिवराज्याभिषेक सोहळ्याचा ऐतिहासिक जल्लोष रंगणार आहे. छत्रपती शिवाजी महाराजांच्या राज्याभिषेक दिनानिमित्त लाखो शिवभक्त रायगडाकडे धाव घेणार असल्याने संपूर्ण रायगड जिल्हा भगव्या उत्साहाने न्हाऊन निघणार आहे. मात्र या अभूतपूर्व गर्दीमुळे वाहतूक व्यवस्थेवर ताण येण्याची शक्यता लक्षात घेऊन प्रशासनाने मोठा निर्णय घेतला आहे. ५ जून दुपारी ४ वाजल्यापासून ६ जून रात्री १० वाजेपर्यंत मुंबई-गोवा राष्ट्रीय महामार्गासह रायगडकडे जाणाऱ्या प्रमुख मार्गांवर जड आणि अवजड वाहनांच्या वाहतुकीस बंदी घालण्यात आली आहे. जिल्हाधिकारी किशन जावळे यांनी यासंदर्भातील अधिसूचना जारी करत शिवभक्तांचा प्रवास सुरक्षित आणि सुरळीत करण्यासाठी प्रशासन सज्ज असल्याचे स्पष्ट केले आहे.
रायगड किल्ल्यावर होणाऱ्या या सोहळ्यासाठी रायगड, पुणे, सातारा, कोल्हापूर, मुंबई आणि राज्यातील विविध भागांतून हजारो वाहने रवाना होतात. शिवभक्तांचा ओघ इतका मोठा असतो की रायगडकडे जाणारे सर्व मार्ग अक्षरशः गर्दीने फुलून जातात. माणगाव-निजामपूर मार्गे पाचाड, ढालघरफाटा मार्गे पाचाड तसेच महाड-नातेखिंड मार्गे रायगड असे तीन प्रमुख मार्ग या काळात सतत वाहनांनी गजबजलेले असतात. त्यातच आयोजकांची वाहने, शासकीय यंत्रणांची वाहतूक आणि इतर सेवावाहने यामुळे रस्त्यांवरील ताण आणखी वाढतो. अशा परिस्थितीत मोठ्या ट्रक, कंटेनर आणि अवजड वाहनांची वाहतूक सुरू राहिल्यास अपघात आणि वाहतूक कोंडीचे गंभीर संकट निर्माण होऊ शकते.
विशेषतः मुंबई-गोवा महामार्गावरील वाकणफाटा-नागोठणे-कोलाड-माणगाव-महाड हा पट्टा आणि कशेडी घाट परिसर या काळात अतिशय संवेदनशील मानला जातो. हजारो चारचाकी, दुचाकी आणि खासगी वाहनांचा ताफा रायगडाच्या दिशेने मार्गक्रमण करत असताना जड वाहनांची वर्दळ अडथळा ठरू नये, यासाठी ही बंदी लागू करण्यात आली आहे. प्रशासनाने वाहतूक पोलिस, महसूल विभाग आणि इतर यंत्रणांना विशेष सूचना दिल्या असून सर्व मार्गांवर कडक देखरेख ठेवली जाणार आहे. शिवभक्तांना कोणत्याही प्रकारचा त्रास होऊ नये, तसेच राज्याच्या वैभवशाली इतिहासाला साजेसा सोहळा निर्विघ्न पार पडावा, यासाठी प्रशासनाने व्यापक नियोजन केले आहे.
तथापि, या बंदीमधून जीवनावश्यक सेवांना दिलासा देण्यात आला आहे. दूध, पेट्रोल, डिझेल, स्वयंपाकाचा गॅस, औषधे, ऑक्सिजन आणि भाजीपाला वाहतूक करणारी वाहने नियमित सुरू राहतील. तसेच रुग्णवाहिका, अग्निशमन दल आणि पोलिसांची वाहने यांनाही या बंदीतून सूट देण्यात आली आहे. शिवरायांच्या राजधानीकडे जाणाऱ्या प्रत्येक भक्ताचा प्रवास सुखकर व्हावा आणि ऐतिहासिक सोहळा कोणत्याही अडथळ्याविना पार पडावा, यासाठी प्रशासनाने घेतलेला हा निर्णय महत्त्वपूर्ण मानला जात आहे.