मावळच्या १,१०० एकरांवर उद्योगनगरीचा आराखडा; रोजगार, गुंतवणूक आणि विकासाचे नवे दार उघडणार
महाराष्ट्र २४ ।। विशेष प्रतिनिधी ।। दि. ४ जून २०२६ ।। पुणे-मुंबई द्रुतगती मार्गावरून धावणाऱ्या वाहनांना आता लवकरच केवळ डोंगर-दऱ्या आणि बोगदेच दिसणार नाहीत, तर उद्योगांच्या धुराड्यांनी सजलेली एक नवी आर्थिक नगरीही पाहायला मिळू शकते. मावळ तालुक्यातील बऊर, करंज आणि ब्राह्मणवाडी परिसरात तब्बल १,१०० एकरांवर नवी एमआयडीसी उभारण्याचा निर्णय प्रत्यक्ष अंमलबजावणीच्या टप्प्यात पोहोचला आहे. अनेक वर्षे कागदोपत्री राहिलेल्या या प्रकल्पाने आता वेग घेतला असून सर्वेक्षण, मोजणी आणि भूसंपादनाच्या हालचाली सुरू झाल्या आहेत. त्यामुळे मावळच्या विकासाचा नवा अध्याय लिहिला जाणार असल्याची चर्चा परिसरात रंगू लागली आहे.
या भागातील कोरडवाहू आणि तुलनेने कमी उत्पादनक्षम जमिनींची निवड करण्यात आली आहे. विशेष म्हणजे, द्रुतगती मार्गाच्या दोन्ही बाजूंना हे औद्योगिक क्षेत्र विकसित होणार असल्याने वाहतूक, मालवहन आणि लॉजिस्टिक सुविधांना मोठा फायदा मिळणार आहे. उद्योगांसाठी जागा, महामार्गाची थेट जोडणी आणि पुणे-मुंबई या दोन आर्थिक केंद्रांच्या मधोमध असलेले स्थान यामुळे हा प्रकल्प गुंतवणूकदारांसाठी आकर्षणाचा केंद्रबिंदू ठरण्याची शक्यता आहे. आजवर शेती आणि निवासासाठी ओळखल्या जाणाऱ्या या परिसराचे रूपांतर आता उद्योगनगरीत होण्याची चिन्हे दिसू लागली आहेत.
विशेष म्हणजे, या एमआयडीसीची कहाणी आजची नाही. तब्बल २००७ मध्ये उद्योग विभागाने हे क्षेत्र अधिसूचित केले होते. त्यानंतर २०१७ मध्ये जमिनींच्या खरेदी-विक्रीवर निर्बंध आले; पण प्रत्यक्ष काम मात्र पुढे सरकत नव्हते. आता मात्र प्रशासनाने गती पकडली आहे. बऊर आणि करंज येथे सुमारे ५०० एकर, तर ब्राह्मणवाडीत जवळपास ६०० एकर जमीन निश्चित करण्यात आली आहे. प्राथमिक माहितीनुसार प्रतिएकर सुमारे ८४ लाख रुपये किंमत निश्चित करण्यात आली असून भूसंपादनाची प्रक्रिया जिल्हाधिकारी कार्यालयाच्या पातळीवर पुढे सरकत आहे. त्यामुळे दीर्घ प्रतीक्षेनंतर या प्रकल्पाला प्रत्यक्ष आकार मिळण्याची आशा निर्माण झाली आहे.
मावळसारख्या वेगाने वाढणाऱ्या तालुक्यासाठी ही केवळ एमआयडीसी नसून आर्थिक परिवर्तनाची संधी मानली जात आहे. हजारो युवकांसाठी रोजगाराच्या नव्या वाटा खुल्या होतील, पूरक व्यवसायांना चालना मिळेल आणि स्थानिक अर्थव्यवस्थेत मोठी उलाढाल निर्माण होईल. उद्योग आले की रस्ते, वीज, पाणी, निवास, शैक्षणिक सुविधा आणि व्यापारी संकुलेही येतात. त्यामुळे हा प्रकल्प केवळ जमिनींच्या व्यवहारापुरता मर्यादित नसून संपूर्ण परिसराच्या भवितव्याशी जोडलेला आहे. द्रुतगती मार्गावर धावणाऱ्या महाराष्ट्राच्या विकासरथाला आता मावळमधील ही नवी एमआयडीसी आणखी वेग देणार, यात शंका नाही.