महाराष्ट्र 24 – ऑनलाईन – दिनांक 21 जून- निरोगी शरीर, निर्मळ मन आणि सजग आत्मा’ या उदात्त संदेशाला केंद्रस्थानी ठेवत संत निरंकारी मिशनतर्फे आंतरराष्ट्रीय योग दिनानिमित्त देशव्यापी योग व आध्यात्मिक चेतना अभियानाचे आयोजन करण्यात आले आहे. सतगुरु माता सुदीक्षा जी महाराज यांच्या पावन आशीर्वाद व दूरदर्शी मार्गदर्शनाखाली राबविण्यात येणारा हा उपक्रम मानवकल्याण, समग्र आरोग्य आणि आत्मिक उन्नतीचा संदेश जनमानसापर्यंत पोहोचविणारा ठरत आहे. योगाला केवळ शारीरिक व्यायाम न मानता जीवनशैलीतील सकारात्मक परिवर्तनाचे प्रभावी माध्यम म्हणून स्वीकारण्याचे आवाहन या अभियानातून करण्यात येत आहे.
“स्वस्थ मन, सहज जीवन” हा सतगुरु माता जींचा प्रेरणादायी संदेश जीवनातील संतुलन, मानसिक स्थैर्य आणि आध्यात्मिक जागरूकतेचे महत्त्व अधोरेखित करतो. मानवी शरीर ही परमात्म्याने दिलेली अमूल्य देणगी असून त्याचे आरोग्य जपणे ही प्रत्येकाची जबाबदारी आहे. सुदृढ शरीर आणि शांत मनाच्या माध्यमातून व्यक्ती आपल्या सामाजिक, मानवी आणि आध्यात्मिक जबाबदाऱ्या अधिक सक्षमपणे पार पाडू शकते, असा संदेश मिशनच्या कार्यातून सातत्याने दिला जात आहे. योगाच्या माध्यमातून आत्मबोध, अंतर्मनातील शांतता, मानवी एकता आणि विश्वबंधुत्वाची भावना विकसित करण्याचा प्रयत्न या अभियानातून केला जात आहे.
आंतरराष्ट्रीय योग दिनानिमित्त रविवार, 21 जून 2026 रोजी सकाळी 6 वाजता भोसरी, पिंपरी, रुपीनगरसह पुणे जिल्ह्यातील विविध सत्संग भवनांमध्ये तसेच देशभरातील 1500 हून अधिक केंद्रांवर एकाच वेळी योग शिबिरांचे आयोजन करण्यात येणार आहे. स्थानिक योग प्रशिक्षकांच्या मार्गदर्शनाखाली मोकळ्या मैदानांमध्ये व उद्यानांमध्ये होणाऱ्या या उपक्रमात श्रद्धाळू, सेवादल स्वयंसेवक आणि स्थानिक नागरिक मोठ्या संख्येने सहभागी होणार आहेत. यंदाच्या आंतरराष्ट्रीय योग दिनाची “स्वस्थ जीवनासाठी योग” ही संकल्पना समाजात शारीरिक, मानसिक, सामाजिक आणि आध्यात्मिक आरोग्याचा समतोल साधण्याचा संदेश देत आहे.
संत निरंकारी चॅरिटेबल फाउंडेशनचे सचिव आदरणीय जोगिंदर सुखीजा जी यांनी सांगितले की, 2015 पासून फाउंडेशनतर्फे योग दिनाचे राष्ट्रव्यापी अभियान सातत्याने राबविण्यात येत आहे. भारताच्या प्राचीन परंपरेचा अमूल्य ठेवा असलेला योग व्यक्तीला शारीरिक बळ, मानसिक स्थैर्य, सकारात्मक विचार आणि आत्मिक चेतना प्रदान करतो. आधुनिक जीवनशैलीतील तणाव आणि विविध समस्यांवर मात करण्यासाठी योग प्रभावी ठरत असून संत निरंकारी मिशनचा हा उपक्रम समाजात सर्वांगीण कल्याणाची जागरूकता निर्माण करून प्रत्येक व्यक्तीला निरोगी, संतुलित, ऊर्जावान आणि आनंदी जीवनाकडे प्रेरित करणारा ठरत आहे.