‘निरोगी जीवनासाठी योग’ संकल्पनेतून शारीरिक, मानसिक आणि आत्मिक संतुलनाचा संदेश
भोसरी, दि. २१ जून २०२६ : आंतरराष्ट्रीय योग दिनाचे औचित्य साधत संत निरंकारी मिशनतर्फे भोसरी, पिंपरी आणि रुपीनगर परिसरात योग व आध्यात्मिक जागृतीचे प्रेरणादायी कार्यक्रम उत्साहात पार पडले. सद्गुरु माता सुदीक्षा जी महाराज आणि निरंकारी राजपिता रमित जी यांच्या पावन आशीर्वादाने आयोजित या उपक्रमात श्रद्धाळू भक्तगण, सेवादल स्वयंसेवक आणि स्थानिक नागरिकांनी मोठ्या संख्येने सहभाग घेतला. योगाच्या माध्यमातून निरोगी जीवनशैलीचा संदेश देत समाजात आरोग्याबाबत जागरूकता निर्माण करण्याचा प्रयत्न यावेळी करण्यात आला.
पुणे झोनचे झोनल इंचार्ज श्री अशोक अहुजा यांनी माहिती देताना सांगितले की, योग हा केवळ व्यायाम नसून शरीर, मन आणि आत्मा यांना जोडणारा जीवनमार्ग आहे. आर्ट ऑफ लिव्हिंगच्या अनुभवी योग प्रशिक्षकांच्या मार्गदर्शनाखाली विविध योगासने, प्राणायाम आणि ध्यानसाधना सत्रांचे आयोजन करण्यात आले. सहभागी नागरिकांनी उत्स्फूर्तपणे योगाभ्यास करत निरोगी, संतुलित आणि सकारात्मक जीवनशैली अंगीकारण्याचा संकल्प केला.
सद्गुरु माता सुदीक्षा जी महाराज आपल्या संदेशातून नेहमीच ‘स्वस्थ मन, सहज जीवन’ या विचारावर भर देतात. मानवी शरीर ही परमात्म्याची अनमोल देणगी असून त्याचे संरक्षण आणि संवर्धन करणे हे प्रत्येकाचे कर्तव्य असल्याचे त्या सांगतात. योगामुळे केवळ शारीरिक तंदुरुस्तीच नव्हे, तर मानसिक स्थैर्य, आत्मिक शांती आणि जीवनातील सकारात्मकता वृद्धिंगत होते. त्यामुळे दीर्घायुष्य आणि यशस्वी जीवनासाठी योगाचे महत्त्व अनन्यसाधारण असल्याचा संदेश या कार्यक्रमातून देण्यात आला.
यंदाच्या ‘निरोगी जीवनासाठी योग’ या संकल्पनेशी सुसंगत राहून संत निरंकारी मिशनने देशभरातील १५०० हून अधिक केंद्रांवर सामूहिक योग कार्यक्रमांचे आयोजन केले. संत निरंकारी चॅरिटेबल फाउंडेशनचे सचिव आदरणीय श्री जोगिंदर सुखीजा यांच्या माहितीनुसार, या उपक्रमाचा मुख्य उद्देश शारीरिक आरोग्य, मानसिक संतुलन आणि आध्यात्मिक चेतना यांचा प्रसार करणे हा होता. भोसरीतील कार्यक्रमानेही समाजात आरोग्य, शिस्त, आत्मजागृती आणि सकारात्मक जीवनमूल्यांविषयी नवी प्रेरणा निर्माण करत सर्वांगीण कल्याणाचा प्रभावी संदेश दिला.