अस्वच्छ स्वयंपाकघरांना थेट कुलूप; परवाने निलंबित होताच मुंबईतील खाद्यव्यवसायात खळबळ
महाराष्ट्र २४ ।। विशेष प्रतिनिधी ।। दि. ३० जून २०२६ ।। मुंबईत पैशांचा रुबाब दाखवत पंचतारांकित थाट मिरवणाऱ्यांची खरी अवस्था अखेर स्वयंपाकघरात उघडी पडली. बाहेर चमचमीत दिवे, वातानुकूलित दालने आणि महागड्या मेन्यूचे प्रदर्शन; पण आत मात्र उंदीर, झुरळे, धूळ, कचरा आणि आरोग्याशी खेळ! हीच वस्तुस्थिती समोर येताच अन्न व औषध प्रशासनाचे आयुक्त तुकाराम मुंढे यांनी कोणाचीही भीडभाड न ठेवता थेट सहा नामांकित हॉटेल्स, रेस्टॉरंट्स आणि बेकऱ्यांचे परवाने निलंबित केले. नियमांचा बडेजाव करणाऱ्यांना कायद्याचा झटका कसा असतो, याचा धडा या कारवाईने शिकवला. पैशांच्या बळावर सर्व काही चालते, हा गैरसमज एका दिवसात चक्काचूर झाला आणि मुंबईतील हॉटेल उद्योगात एकच खळबळ उडाली.
या धडक मोहिमेत मोठ्या उद्योगसमूहाशी संबंधित रेस्टॉरंटलाही माफी मिळाली नाही. नरिमन पॉइंट येथील ‘फ्लिट अँड वार्सा’ या उच्चभ्रू रेस्टॉरंटमध्ये अन्नपदार्थांच्या चुकीच्या ब्रँडिंगसारखे गंभीर प्रकार आढळल्यानंतर त्याचाही परवाना निलंबित करण्यात आला. सांताक्रूझमधील हॉटेल गोपालकृष्णमध्ये किचनमध्ये उंदीर मुक्तपणे फिरताना दिसले, अंधेरीतील कराक एंटरप्रायझेसमध्ये झुरळांचे साम्राज्य सापडले, तर वांद्र्यातील ‘मद्रास डायरीज’मध्ये स्वच्छतेच्या नियमांची अक्षरशः पायमल्ली होत असल्याचे स्पष्ट झाले. बोरीवलीतील एम. के. बेकरीमध्ये धूळ आणि कचऱ्याच्या वातावरणात अन्न उत्पादन सुरू होते, तर भांडुपमधील हॉटेल श्रीकृष्णमध्ये आरोग्यास धोकादायक परिस्थिती आढळली. ग्राहकांच्या ताटात जेवण वाढण्यापूर्वी त्यांच्या जीवाशी खेळ सुरू असल्याचे या तपासणीत उघड झाले.
अन्न विकणे म्हणजे फक्त व्यवसाय नाही, तर लोकांच्या आरोग्याची जबाबदारी असते. पण अनेक ठिकाणी नफ्याच्या हव्यासापुढे स्वच्छता, गुणवत्ता आणि नियम यांना अक्षरशः कचरापेटीत फेकल्याचे चित्र दिसून आले. महागडे बिल घेणाऱ्या अनेक आस्थापनांनी किमान स्वच्छतेचे निकषही पाळले नाहीत, ही बाब अधिक धक्कादायक ठरली. बाहेरून चकचकीत दिसणाऱ्या इमारतींच्या आत जर अस्वच्छतेचे साम्राज्य असेल, तर ग्राहकांनी नेमके विश्वास ठेवायचा तरी कुणावर, असा प्रश्न आता सर्वसामान्य नागरिक विचारू लागले आहेत. ही कारवाई केवळ सहा हॉटेल्सपुरती मर्यादित नसून संपूर्ण खाद्यव्यवसायाला दिलेला स्पष्ट संदेश आहे.
“नियम पाळा, अन्यथा कारवाईला सामोरे जा,” हा संदेश आता केवळ घोषवाक्य राहिलेला नाही, तर प्रत्यक्ष अंमलबजावणीत उतरला आहे. अन्न सुरक्षेशी तडजोड करणाऱ्यांना कोणतीही सवलत मिळणार नाही, हे या कारवाईतून स्पष्ट झाले. ग्राहकांच्या आरोग्याशी खेळणाऱ्या प्रत्येक आस्थापनावर अशीच कठोर कारवाई झाली, तरच खाद्यव्यवसायातील बेजबाबदारपणाला लगाम बसेल. मुंबईतील या धाडसी मोहिमेने केवळ सहा परवाने निलंबित केले नाहीत, तर निष्काळजीपणावर चालणाऱ्या संपूर्ण व्यवस्थेलाच आरशात स्वतःचा चेहरा पाहण्यास भाग पाडले आहे.