अँटी गुंडा स्कॉड अव्वल; २,३४१ पाहिजे आरोपी अद्याप पोलिसांच्या रडारवर
महाराष्ट्र २४ ।। ऑनलाईन ।। विशेष प्रतिनिधी ।। दि. ७ ऑक्टोबर २०२६ ।। पिंपरी-चिंचवड : गुन्हा करून पोलिसांना गुंगारा देत वर्षानुवर्षे पसार राहण्याचा खेळ आता फार काळ चालणार नाही, असा स्पष्ट इशारा पिंपरी-चिंचवड पोलिसांच्या ‘मिशन वॉन्टेड’ने दिला आहे. २७ जुलै ते १२ ऑगस्टदरम्यान राबविण्यात आलेल्या विशेष मोहिमेत पोलीस ठाणे आणि गुन्हे शाखेने तब्बल २४७ पाहिजे आरोपींना पकडले. पोलीस आयुक्त विनय कुमार चौबे यांच्या आदेशाने राबविलेल्या या मोहिमेत गुन्हे शाखेच्या अँटी गुंडा स्कॉडने १३२ गुणांसह अव्वल स्थान मिळविले. युनिट तीनने १०३ गुणांसह दुसरा, तर युनिट एक आणि युनिट दोनने प्रत्येकी ८४ गुणांसह संयुक्त तिसरा क्रमांक पटकावला. मोहिमेपूर्वी पोलिसांच्या रडारवर २ हजार ६३५ पाहिजे आणि ३२ फरारी असे एकूण २ हजार ६६७ आरोपी होते.
पोलिसांनी आरोपींचे जुने पत्ते, नातेवाईक, संपर्कातील व्यक्ती आणि उपलब्ध माहितीचा माग काढत शोधमोहीम तीव्र केली. त्यातून पोलीस ठाण्यांनी १४०, तर गुन्हे शाखेने १०७ आरोपी पकडले. मृत्यू, अटकपूर्व कारवाई, दुबार नावे किंवा इतर कारणांमुळे ७९ प्रकरणे कमी झाली. परिणामी ३२६ प्रकरणांचा निपटारा झाला असला तरी तब्बल २ हजार ३४१ आरोपींचा शोध अद्याप बाकी आहे. गुन्हे शाखेच्या गुणांकनात अँटी गुंडा स्कॉडने मोक्कातील सहा, गंभीर गुन्ह्यांतील नऊ आणि इतर गुन्ह्यांतील सहा अशा २१ आरोपींना पकडले. युनिट तीनने संख्येने सर्वाधिक २४ आरोपी पकडले; मात्र गुन्ह्यांच्या गांभीर्यानुसार गुणांकन असल्याने अँटी गुंडा स्कॉडने बाजी मारली. पोलीस ठाण्यांमध्ये हिंजवडीने १९ आरोपी पकडून ८४ गुणांसह आघाडी घेतली. पिंपरी ५७, सांगवी ५४ गुणांसह पुढे राहिले.
ही कारवाई केवळ आकडेवारीचा खेळ ठरू नये, हीच खरी कसोटी आहे. कारण २,३४१ आरोपी अजूनही पोलिसांच्या शोधयादीत असतील, तर मिशनची खरी परीक्षा आता सुरू झाली आहे. जुन्या गुन्ह्यांच्या फायली धूळ झटकून उघडणे आणि आरोपींपर्यंत पोहोचणे ही पोलिसांची जबाबदारी आहे; तर पकडलेल्या आरोपींवर न्यायालयीन प्रक्रिया वेगाने आणि निष्पक्षपणे होणे तितकेच महत्त्वाचे आहे. “गंभीर गुन्हे करून फरार झालेल्या तसेच दीर्घकाळापासून पाहिजे असलेल्या आरोपींना कायद्याच्या कक्षेत आणण्यासाठी ही विशेष मोहीम राबविण्यात आली. अद्याप फरार असलेल्या आरोपींचा शोधही त्याच तीव्रतेने सुरू राहणार आहे. गुन्हा करून फरार राहिल्यास पोलीस आपल्यापर्यंत पोहोचणार, हा स्पष्ट संदेश या कारवाईतून देण्यात आला आहे,” असे पोलीस आयुक्त विनय कुमार चौबे यांनी स्पष्ट केले. आता प्रश्न एवढाच—उरलेल्या २,३४१ आरोपींपर्यंत पोलीस कधी पोहोचणार?