महाराष्ट्र २४ – ऑनलाईन वृत्तसेवा – विशेष प्रतिनिधी – दि. ११ जानेवारी – अर्थसंकल्पाचे वेध लागलेल्या गुंतवणूकदारांनी भांडवली बाजारात चौफेर खरेदी सुरूच ठेवल्याने आज सोमवारी सेन्सेक्सने प्रथमच ४९ हजारांचा टप्पा ओलांडला आहे. राष्ट्रीय शेअर बाजाराचा निफ्टी १४४०० अंकांची पातळी सर केली आहे.
अमेरिकेतील अराजकीय अस्थिरता संपुष्टात आली आहे. मावळते राष्ट्राध्यक्ष डोनाल्ड ट्रम्प यांनी नवे अध्यक्ष जो बायडेन यांच्याकडे सत्ता सुपूर्द करण्याची तयारी दर्शवली आहे. ट्रम्प यांच्या भूमिकेनंतर बायडेन प्रशासन तातडीने अर्थव्यवस्थेला सावरण्यासाठी आणखी मोठे आर्थिक पॅकेज जाहीर करेल, असा अंदाज कमॉडिटी विश्लेषकांनी व्यक्त केला आहे. त्यातच अमेरिकेतील बॉण्ड परतावा १० वर्षांच्या उच्चांकी स्तरावर गेला आहे. त्यामुळे गेल्या आठवड्यातील शेवटच्या सत्रात शुक्रवारी अमेरिकन शेअर बाजार तेजीसह बंद झाले. आज आशियातील शेअर बाजारांमध्ये तेजी दिसून आली. जपानचा निक्केई ३० वर्षांतील उच्चांकी स्तरावर आहे. शांघाई आणि सिंगापूर एक्सचेंजमध्ये वाढ झाली आहे.
आज बाजारात आयटी सेवा, ऑटो या क्षेत्रात खरेदी दिसून आली. इन्फोसिस, एचसीएल टेक, टीसीएस, टेक महिंद्रा, हिंदुस्थान युनिलिव्हर, आयटीसी, भारती एअरटेल, टायटन, एचडीएफसी, एशियन पेंट्स, एनटीपीसी, मारुती, बजाज ऑटो, पॉवरग्रीड, एल अँड टी, इंडसइंड बँक, डॉ. रेड्डी लॅब या शेअरमध्ये वाढ झाली आहे.
नेस्ले, आयसीआयसीआय बँक, रिलायन्स इंडस्ट्रीज, एसबीआय, ओएनजीसी, बजाज फायनान्स, ऍक्सिस बँक, कोटक महिंद्रा बँक, सन फार्मा, अल्ट्रा टेक सिमेंट या शेअरमध्ये घसरण झाली आहे. सध्या सेन्सेक्स ३१४ अंकांनी वधारला असून तो ४९०९६ अंकांवर आहे. निफ्टी ७९ अंकांनी वधारला असून तो १४४२६ अंकावर आहे. कोर्पोरेट्सकडून तिसऱ्या तिमाही निकालांची घोषणा केली जाणार आहे. यात काही महत्वाचे शेअर तेजीत आहेत. अव्हेन्यू सुपरमार्टच्या शेअरमध्ये ६ टक्के वाढ झाली. तिसऱ्या तिमाहीत कंपनीच्या नफ्यात १६.३९ टक्के वाढ झाली.
येत्या १ फेब्रुवारी रोजी अर्थसंकल्प सादर केला जाणार आहे. केंद्र सरकारकडून बजेटमध्ये कोणत्या घोषणा होणार याकडे गुंतवणूकदारांचे लक्ष लागलं आहे. करोना संकटाने अर्थव्यवस्थेचं प्रचंड नुकसान झाले. मात्र मागील दोन महिन्यात वस्तू आणि सेवा कर उत्पन्नात झालेली वाढ अर्थव्यवस्था सावरत असल्याचे संकेत देत आहे.