महाराष्ट्र 24 । विशेष प्रतिनिधी । दि.१८ । पिंपरी – चिंचवड ते निगडी या उन्नत मेट्रो मार्गिकेस बुधवारी राज्य मंत्रिमंडळाच्या बैठकीत मान्यता देण्यात आली. पिंपरी-चिंचवड ते स्वारगेट या मार्गिकेमध्ये सुधारणा करून ही अतिरिक्त मार्गिका उभारण्यात येईल. यासाठी ९४६ कोटी ७३ लाख एवढा खर्च येणार असून राज्य शासनावर १७० कोटी ३ लाख इतका खर्चाचा भार असेल.
पिंपरी-चिंचवड ते निगडी या उन्नत रेल्वे प्रकल्पाची लांबी ४.४१ किलोमीटर असून यात ३ स्थानके असतील. या प्रकल्पाची अंमलबजावणी महाराष्ट्र मेट्रो रेल कार्पोरेशनमार्फत करण्यात येईल. यासाठी केंद्र शासनाचा एकूण खर्चाच्या १० टक्के सहभाग असून कर्जाच्या स्वरुपातही निधी उभारण्यात येणार आहे. राज्य शासनाचा एकूण ७९ कोटी ४ लाख तसेच ९० कोटी ६३ लाख रुपये परतफेड करावयाचे दुय्यम कर्ज असे एकूण १७० कोटी ३ लाख असा सहभाग असेल.