महाराष्ट्र २४ – ऑनलाईन – विशेष प्रतिनिधी – दि. ३० मार्च – पिंपरी चिंचवड – शहरातील गोरगरीब, कष्टकरी व झोपड्पट्टीमध्ये राहणाऱ्या नागरिकांना मोठ्या खर्चाच्या आजारांवरील उपचारार्थ व शस्त्रक्रियेसाठी पुणे महानगर पालिकेच्या धर्तीवर शहरी गरीब योजना सुरु करण्यात यावी, शहरी गरीब वैद्यकीय सहाय्य योजनेंतर्गत रूग्णांवर केले जाणारे वैद्यकीय उपचार सीजीएचएस दरपत्रकानुसार केले जातात. एका आर्थिक वर्षासाठी पुणे मनपा कार्यक्षेत्रातील एका कुटूंबासाठी रक्कम रू १ ००० अक्षरी रक्कम ते रू एक लाख रूपये फक्त इतका खर्च पॅनेलवरील खासगी रुग्णालयातील वैद्यकीय उपचारांकरिता देण्यात येतो. सदर योजना तातडीने शहरात सुरु करून शहरातील गरीब कामगार वर्गास वैद्यकीय उपचारासाठी मदतीचा हात द्यावा, अशी आग्रही मागणी पिंपरीचे आमदार अण्णा बनसोडे यांनी पिंपरी-चिंचवड महानगर पालिकेचे आयुक्त राजेश पाटील यांच्याकडे निवेदनाद्वारे केली आहे.
तसेच पुणे महानगर पालिकेने मिळकत धारकांचा विमा उतरविलेला असून, पुणे महानगरपालिका पंडित दिनदयाळ उपाध्याय अपघात विमा योजना, सुरु केली आहे. यात निवासी मिळकतकर धारक व त्यांचे कुटुंब तसेच सेवा शुल्क भरणारे नागरिक व त्यांचे कुटुंब यांच्यासाठी रु. ५ लाखाचे अपघाती विमा संरक्षण, शहरातील नागरिकांना विमा कवच देण्यात आल्यामुळे कर धारकांच्या कुटुंबास एक प्रकारे स्वरक्षण निर्माण झाले आहे.याच धर्तीवर पिंपरी चिंचवड शहरातील नियमित मिळकत कर भरणाऱ्या कर दात्यास विमा स्वरक्षण देणे बाबत मागणी शहरातील मिळकत धारकांची असून, ही योजना शहरात तातडीने सुरु करणे बाबत योग्य ती कार्यवाही करण्यात यावी . अशी मागणी आमदार अण्णा बनसोडे यांनी आयुक्तांकडे केली आहे.