महाराष्ट्र २४ । विशेष प्रतिनिधी । दि. १२ जून । अवघ्या वारकरी संप्रदायाला ओढ असलेल्या श्री क्षेत्र पंढरपूर आषाढी वारी सोहळ्यावर यंदाही कोरोनाचे सावट आहे. वारकऱयांची झालेली चर्चा, त्यानंतर शासनाने नेमलेल्या समितीच्या शिफारसीनंतर राज्य सरकारने फक्त दहा मानाच्या पालख्यांनाच प्रत्येकी दोन बसने जाण्याची परवानगी दिली आहे. पायी वारी सोहळा रद्द करण्यात आला आहे. बसमधील पालख्या वाखरीपासून पुढे दीड किलोमीटर पंढरपूरपर्यंत पायी नेण्यास परवानगी देण्यात आल्याची माहिती उपमुख्यमंत्री अजित पवार यांनी दिली.
गेल्या वर्षीप्रमाणे याहीवर्षी वारीचा सोहळा साध्या पद्धतीने साजरा होणार आहे. पायी वारीसाठी यंदाही बसमधून पालख्या आणि पादुका नेण्यास परवानगी देण्यात आली आहे. राज्यातील ज्या मानाच्या दहा महत्त्वाच्या पालख्या आहेत, त्यांनाच आषाढी वारीसाठी परवानगी देण्यात आली. या पालख्यांना बसमधून जाण्यासाठी प्रत्येकी दोन याप्रमाणे 20 बसेस देण्यात येणार असल्याचे पवार यांनी सांगितले.
पालखी सोहळ्याचं प्रस्थान हे देहू आणि आळंदीतून होतं. या प्रस्थान सोहळ्यासाठी यावेळी 100 जणांच्या उपस्थितीला परवानगी देण्यात आली आहे. उर्वरित मानाच्या आठ पालखी प्रस्थान सोहळ्यास प्रत्येकी पन्नास जणांच्या उपस्थितीला परवानगी देण्यात आली आहे, असे अजित पवार यांनी सांगितले.
संत ज्ञानेश्वर महाराज आळंदी, संत तुकाराम महाराज देहू, संत एकनाथ महाराज पैठण, संत निवृत्ती महाराज पालखी सोहळा त्र्यंबकेश्वर, सोपानकाका महाराज पालखी सासवड, चांगवटेश्वर महाराज पालखी सोहळा सासवड, संत मुक्ताबाई पालखी सोहळा मुक्ताईनगर, विठ्ठल पालखी सोहळा काQडिण्यपूर, संत नामदेव पालखी सोहळा पंढरपूर आणि सखाराम महाराज अमळनेरकर पालखी सोहळा अमळनेर या मानाच्या दहा पालख्यांचा सोहळा पंढरपूर वारीसाठी असतो, त्यांना मर्यादित वारकरी आणि दोन बसमधून पादुका आणि पालखी पंढरपूरला नेण्यास परवानगी देण्यात आली आहे.