महाराष्ट्र २४ । विशेष प्रतिनिधी । दि. ९ ऑक्टोबर । प्रदूषण रोखणे आणि इंधनदरवाढीवर उपाय म्हणून राज्य परिवहन (एसटी) महामंडळाने पर्यावरणपूरक इंधनाच्या पर्यायाचा विलंबाने का असेना विचार सुरू केला आहे. डिझेलवर धावणाऱ्या एक हजार गाड्यांचे सीएनजीमध्ये परिवर्तन करण्याचा निर्णय एसटी महामंडळाने घेतला आहे. सीएनजीमुळे इंधन खर्च निम्म्याने कमी होणार असून यामुळे महामंडळाला काही अंशी दिलासा मिळणार आहे.
सध्या पेट्रोल एकशे दहा रुपयांच्या आसपास आणि डिझेल शंभराच्या उंबरठ्यावर पोहोचले आहे. महामंडळाच्या एकूण खर्चातील ३० टक्क्यांहून अधिक रक्कम इंधनासाठी खर्च होते. यावर उपाय म्हणून मार्च २०१९मध्ये तत्कालीन परिवहनमंत्री दिवाकर रावते यांनी सीएनजीवर एसटी चालवण्याची घोषणा केली होती. ही घोषणा आता प्रत्यक्षात येण्याची चिन्हे आहेत. महामंडळाच्या ताफ्यातील एक हजार गाड्यांचे सीएनजीमध्ये परिवर्तन करण्यात येणार आहे. यासाठी बसमध्ये सीएनजी किट आणि ‘इंजिन कंट्रोल मॉड्यूल’ बसविण्यात येणार आहे. संबंधित कंत्राटदाराला पुढील सात वर्षांसाठी देखभालीसह संपूर्ण सहकार्य करण्याचीदेखील अट घालण्यात आली आहे. प्रति गाडी साधारणपणे १४ लाख रुपये खर्च अपेक्षित असून या प्रकल्पाची एकूण अंदाजित किंमत १४० कोटी रुपये आहे. यासाठी निविदा मागवण्यात आल्या आहेत. निविदा दाखल करण्याची शेवटची तारीख २ नोव्हेंबर आहे. एसटीची आर्थिक स्थिती नाजूक असल्याने हा निधी सरकारकडून देण्यात येईल, अशी माहिती एसटीतील वरिष्ठ अधिकाऱ्यांनी दिली.
सीएनजी सहज उपलब्ध असलेल्या शहरांत अर्थात मुंबई, ठाणे, रायगड, पनवेल, पुणे येथे सीएनजीवरील एसटी धावणार आहे. या गाड्यांमुळे प्रवाशांना ध्वनी व वायू प्रदूषणाशिवाय सेवा देणे शक्य होईल. सीएनजी प्रतिकिलोसाठी ५२ रुपये, तर एक लिटर डिझेलसाठी ९९ रुपये मोजावे लागतात. सीएनजीमुळे इंधन खर्च थेट निम्म्यावर येणार असल्याने महामंडळासाठी देखील ही जमेची बाजू ठरेल, असा विश्वास अधिकाऱ्यांनी व्यक्त केला.
महामंडळाच्या ताफ्यात एकूण १६ हजार ५०० गाड्या आहेत. यात ११०० महाकार्गो, ८५० मानव विकास योजनेंतर्गत अदिवासी भागांसाठी, ५०० शिवशाही, ४३० एशियाड, १०० शिवनेरी आणि जवळपास १३ हजार साध्या गाड्या आहेत.