महाराष्ट्र २४ । विशेष प्रतिनिधी । दि २८ फेब्रुवारी । मागील काही काळापासून ओबीसी आरक्षणासाठी (OBC Reservation) राज्य सरकार आपला कायदेशीर लढा लढत आहे. पण विविध बाबींमुळे सतत सुनावणी पुढे ढकलली जात आहे. आज पुन्हा एकदा ओबीसी संदर्भातील सुनावणी पुढे ढकलण्यात आली आहे. त्यामुळे ओबीसी आरक्षणाबाबत ठोस निकाल जाणून घेण्यासाठी आणखी काही काळ वाट पाहावी लागणार आहे. आता ओबीसी राजकीय आरक्षणाची सुनावणी बुधवारी म्हणजेच 2 मार्च रोजी होणार आहे.
निवडणुकीशी संबंधित दोन याचिकांवर एकाच वेळी सुनावणी करणार असल्याचं सर्वोच्च न्यायालयानं म्हटलं आहे. त्यामुळे आता बुधवारी 2 मार्च रोजी ओबीसी आरक्षणावर सुनावणी होणार आहे. त्यानंतरच आगामी महापालिका निवडणुकीबाबत चित्र स्पष्ट होणार आहे. अलीकडेच सर्वोच्च न्यायालयानं 17 डिसेंबर रोजी ओबीसी आरक्षणासाठीची त्रिसूत्री पार पाडल्याशिवाय राजकीय आरक्षण लागू करता येणार नसल्याचं म्हटलं होतं. तसेच कायदेशीर प्रक्रिया पूर्ण होईपर्यंत ओबीसीसाठीच्या राखीव जागा खुल्या प्रवर्गातल्या म्हणूनच गृहीत धरल्या जाव्यात असा आदेशही न्यायालयानं दिला होता.
ओबीसी आरक्षणाबाबत प्रतिक्रिया देताना काँग्रेस नेते विजय वडेट्टीवार यांन म्हटलं की, ‘स्थानिक स्वराज्य संस्थांच्या निवडणुका ओबीसी आरक्षणाअंतर्गत घ्यायच्या की आरक्षणाशिवाय घ्यायच्या याबाबतची याचिका सुनावणीसाठी सुप्रीम कोर्टात आली होती. मात्र निवडणूक आयोगानं आणखी एक याचिका दाखल केल्यामुळे ही सुनावणी पुढे ढकलण्यात आली आहे. पुढील सुनावणी 2 तारखेला होणार आहे. निवडणूक आयोगाच्या याचिकाबाबत अभ्यास केल्यानंतर सरकार आपली भूमिका मांडेल. सरकार आपली बाजू कुठेही कमकुवत होऊ देणार नाही. तसेच एमपेरिकल डेटावर काम सुरू असल्याचंही वडेट्टीवार यांनी सांगितलं आहे.