महाराष्ट्र २४ । विशेष प्रतिनिधी । दि ९ सप्टेंबर । Ganpati Visarjan 2022 : भक्तांच्या घरचा दहा दिवसांचा पाहुणचार घेऊन गणपती बाप्पा (Ganpati 2022) आज आपल्या गावाला जाणार आहे. आज लाडक्या बाप्पाचं विसर्जन होणार आहे. पुण्यातील पाच मानाच्या गणपतीचे आज विसर्जन मिरवणूक १० वाजता सुरु होणार आहे. श्रीमंत दगडूशेठ हलवाई सार्वजनिक गणपती ट्रस्ट, सुवर्णयुग तरुण मंडळच्यावतीने ट्रस्टच्या 130 व्या वर्षानिमित्त आयोजित गणेशोत्सवाची सांगता मिरवणूक आज अनंत चतुर्दशीला थाटात निघणार आहे. यंदा श्री स्वानंदेश रथामध्ये ‘दगडूशेठ’ चे गणपती बाप्पा विराजमान होणार आहे. हजारो मोतिया रंगाच्या दिव्यांनी हा रथ उजळून निघणार आहे. विसर्जन मिरवणुकीसाठीचा श्री स्वानंदेश रथ हा दाक्षिणात्य पद्धतीच्या रचनेमध्ये साकारण्यात आला आहे
श्री स्वानंदेश रथावर 8 खांब साकारण्यात आले आहे. रथाचा आकार 15 बाय 15 फूट असून उंची 24 फूट इतकी आहे. रथावर 5 कळस बसविण्यात आले आहेत. एलईडी व मोतिया रंगाच्या दिव्यामध्ये हा रथ साकारण्यात आला आहे. त्यामध्ये विविध रंगाचे एलईडी लाईटस् देखील वापरण्यात आले आहे.
(Ganesh Visarjan) मुंबईतल्या लालबागच्या राजाच्या विसर्जनाची जय्यत तयारी करण्यात आलीय. आकर्षक रांगोळ्या काढण्यात आल्यायत. 9.30 वाजता लालबागचा राजाची आरती होईल. त्यानंतर 10.30 वाजता लालबागाच्या राजाची राजेशाही विसर्जन मिरवणूक लालबाग मार्केटमधून वाजत गाजत निघणार आहे. त्यानंतर गिरगाव चौपाटीपर्यंतच्या विसर्जन मार्गावर लालबाग राजाचे दर्शन घेण्यासाठी गणेशभक्तांची प्रचंड गर्दी पहायला मिळण्याची शक्यता आहे.
तब्बल दोन वर्षांनंतर बाप्पांसाठी जंगी मिरवणुका निघणार असल्याने वाजतगाजत गुलाल उधळत निरोप देण्यासाठी सर्वसामान्य मुंबईकर, महापालिका, पोलीस, वाहतूक शाखा यासह विविध सरकारी यंत्रणा सज्ज झाल्या आहेत. शहर आणि उपनगरांतील चौपाट्या, तलाव, नैसर्गिक जलस्रोतांच्या ठिकाणी महापालिकेने विसर्जनाची चोख तयारी ठेवली आहे. विसर्जनानिमित्त मुंबईतील पोलिस बंदोबस्तात मोठी वाढ करण्यात आलीय.