महाराष्ट्र २४ । विशेष प्रतिनिधी। दि . २२ सप्टेंबर । सायबर गुन्ह्यांमध्ये सध्या सेक्सटॉर्शनची प्रकरणे सर्वाधिक असल्याचे दिसून येत आहे. या गुन्हेपद्धतीचा वापर करून अनेकांकडून खंडणी उकळणाऱ्या १९ वर्षांच्या तरुणास मुंबई गुन्हे शाखेच्या पथकाने नुकतीच राजस्थानमधून अटक केली. अरबाज खान असे त्याचे नाव असून त्याने घाटकोपरमधील एका डॉक्टरला ब्लॅकमेल करून खंडणी उकळली होती. खानच्या मोबाइल कॉल्स आणि बँक खात्याच्या तपशीलावरून त्याच्याकडून फसवल्या गेलेल्या व्यक्तींचा शोध घेतला जात आहे.
घाटकोपरच्या एका डॉक्टरला नोव्हेंबर २०२१मध्ये व्हिडिओ कॉल आला होता. डॉक्टरने हा कॉल उचलताच समोर एका महिलेचा चेहरा दिसला. आधी बोलण्यात गुंतवून ही महिला विवस्त्र झाली. हे पाहून डॉक्टरने कॉल बंद केला. काही वेळाने त्याला एका अनोळखी मोबाइल क्रमांकवरून फोन आला आणि महिलेसोबत झालेल्या व्हिडिओ कॉलबाबत तो बोलू लागला. या अश्लील व्हिडिओ प्रकरणात कारवाईची धमकी देत फोन करणाऱ्याने डॉक्टरकडे पैशाची मागणी केली. कारवाईची कटकट आणि बदनामी होऊ नये, यासाठी डॉक्टरने काही रक्कम पाठवली. मात्र पैशाची मागणी थांबत नसल्याने अखेर या डॉक्टरने पंतनगर पोलिस ठाण्यात तक्रार केली.
पोलिस आणि गुन्हे शाखा युनिट ७ चे पथक हे खंडणी उकळणाऱ्याचा तेव्हापासून शोध घेत होते. पोलिस निरीक्षक महेश तावडे यांच्या मार्गदर्शनाखाली माग घेत असताना खंडणी उकळणारा राजस्थान येथे असल्याचे समजले. तांत्रिक पुराव्यांच्या आधारे निरीक्षक नीरज उबाळे, उपनिरीक्षक माधव धोत्रे, दीपक पवार, राजेंद्र शिंदे यांचे पथक राजस्थानमध्ये पोहोचले. येथील भारतपूरमधून अरबाज खान याला ताब्यात घेतले. अरबाजने गुगल पे तसेच इतर ऑनलाइन माध्यमातून वेगवेगळ्या खात्यांवर पैसे घेतल्याचे चौकशीतून समोर आले आहे. अरबाज व्हिडिओ कॉल करून दुसरा मोबाइल किंवा काही अॅपचा वापर करून तो मॉर्फिंग करून अश्लील व्हिडीओ तयार करत होता. त्याच्या अटकेमुळे मुंबईतील अनेक गुन्हे उघडकीस आणण्यास मदत होणार असल्याने पोलिसांनी म्हटले आहे.