महाराष्ट्र २४ । विशेष प्रतिनिधी । दि . ३१ जानेवारी । हिंडनबर्ग रिसर्चच्या अहवालानंतर अदानी समूह अडचणीत आला आहे. शेअर बाजारात समूहाची जोरदार घसरण सुरू आहे. अदानी समूहाच्या सर्वच कंपन्यांच्या कामगिरीवर हिंडनबर्ग रिसर्चनं प्रसिद्ध केलेल्या अहवालाचा परिणाम झाला आहे. अदानी समूहाला कर्ज देणाऱ्या बँकांनीदेखील त्यांना देण्यात आलेल्या कर्जाचा आढावा घेण्यास सुरुवात केली आहे.
आवश्यकता भासल्यास अदानी समूहाला कर्ज देणाऱ्या बँकांकडून योग्य पावलं उचलण्यात येतील, असं इंडियन एक्स्प्रेसनं वृत्तात म्हटलं आहे. अदानी समूहावर बँकांचं २ लाख कोटी रुपयांहून अधिकचं कर्ज आहे. अदानी समूहाला देण्यात आलेलं कर्ज आरबीआयनं दिलेल्या लार्ज एक्सपोजर फ्रेमवर्कपेक्षा (एलईएफ) कमी असल्याचं स्टेट बँक ऑफ इंडियानं सांगितलं आहे. एखाद्या कॉर्पोरेट घराण्याला बँक कमाल किती कर्ज देऊ शकते, याला लार्ज एक्सपोजर फ्रेमवर्क म्हणतात. याशिवाय ट्रस्ट आणि रिटेंशन अकाऊंट म्हणजेच टीआरएचा विचार केल्यास बँकांची संपत्ती सुरक्षित असून अदानी समूहाकडून उधारी वसूल करताना त्यांना अडचणी येणार नाहीत.
अदानी समूहावर झालेल्या आरोपांवर आम्ही लक्ष ठेवून आहोत. बँकेच्या जोखीमवर परिणाम करू शकतील असे प्रकार समोर आल्यास आमच्याकडे त्या कंपनीची वर्तमानातील जोखीमचं मूल्यांकन करण्याची आणि काही उपाय करण्याची प्रक्रिया असते, असं एसबीआयच्या अधिकाऱ्यांनी सांगितलं. आम्ही किती सुरक्षित आहोत आणि त्याचा काय प्रकारचा प्रभाव पडू शकतो, यावर आताच भाष्य करणं घाईचं होईल. मात्र आम्ही परिस्थितीवर नजर ठेवून आहोत, अशी माहिती या अधिकाऱ्यानं दिलं.
गेल्या दोन-तीन वर्षांत अदानी समूहानं भारतीय बँकांकडून कमी कर्ज घेत असल्याचं एसबीआयच्या कॉर्पोरेट बँकिगचे संचानक स्वामीनाथन यांनी सांगितलं. ‘अदानी समूह बहुतांश अधिग्रहण प्रक्रिया परदेशी बँकांकडून कर्ज घेऊन पूर्ण करत आहेत. त्यामुळे भारतीय बँकिंग यंत्रणेला धोका नाही,’ असं स्वामीनाथन म्हणाले. इन्व्हेस्टमेंट फर्म सीएलएसएच्या अहवालानुसार, अदानी समूहाच्या पाच आघाडीच्या कंपन्या असलेल्या अदानी एंटरप्रायझेस, अदानी पोर्ट्स, अदानी पॉवर, अदानी ग्रीन आणि अदानी ट्रान्समिशन यांच्यावर एकूण २.१ लाख कोटी रुपयांचं कर्ज आहे. अदानी समूहावरील एकूण कर्जापैकी केवळ ४० टक्के कर्ज भारतीय बँकांचं आहे.
डवल ५.८ लाख कोटींनी कमी झालं आहे. अदानी टोटल गॅस लिमिटेड, अदानी ट्रान्समिशनचे शेअर काल २० टक्क्यांनी खाली आले. याचा परिणाम अदानींच्या संपत्तीवर झाला आहे. जगातील पहिल्या दहा उद्योगपतींच्या यादीतून अदानी बाद झाले आहेत. सर्वसामान्य गुंतवणूकदारांसोबतच देशातील सर्वात मोठी विमान कंपनी असलेल्या एलआयसीलादेखील फटका बसला आहे. गेल्या तीन दिवसांत एलआयसीला जवळपास १९ हजार कोटी रुपयांचं नुकसान झालं आहे.
एलआयसीनं अदानी समूहाच्या कंपन्यांमध्ये मोठी गुंतवणूक केली आहे. ३० सप्टेंबर २०२२ मध्ये एलआयसीचा एकूण इक्विटी पोर्टफोलियो १०.२७ लाख कोटी रुपये होता. यातील ७ टक्के रक्कम एलआयसीनं अदानी समूहाच्या कंपन्यांमध्ये गुंतवली आहे. अदानी समूह संकटात सापडला असताना एलआयसीनं सोमवारी स्पष्टीकरण दिलं आहे. ‘अदानी समूहातील आमची गुंतवणूक एकूण असेट्स अंडर मॅनेजमेंटच्या (एयूएम) एक टक्क्यांच्या आसपास आहे. अदानी समूहाच्या कंपन्यांमधील कंपनीची एकूण भागिदारी डिसेंबरच्या अखेरपर्यंत ३६ हजार कोटी रुपये होती,’ असं एलआयसीकडून सांगण्यात आलं आहे.