महाराष्ट्र २४ । विशेष प्रतिनिधी । ५ फेब्रुवारी । कसबा (Kasba) आणि चिंचवड (Chinchwad) विधानसभा मतदारसंघाची पोटनिवडणूक व्हावी, अशी लोकांची इच्छा असल्याचे वक्तव्य शिवसेना (Shivsena) खासदार संजय राऊत (Sanjay Raut) यांनी केलं. त्यामुळं दोन्ही ठिकाणी महाविकास आघाडीचे उमेदवार निवडणूक लढवणार असून, या दोन्ही जागा जिंकणार असल्याचा विश्वास राऊतांनी व्यक्त केला. ते आज सकाळी प्रसारमाध्यमांशी बोलत होते. कसब्याची जागा काँग्रेस (Congress) लढवणार आहे. तर चिंचवडच्या जागेबाबत आम्ही एकत्र बसून निर्णय घेऊ. चिंचवडच्या जागेसाठी शिवसेना इच्छुक असल्याचेही राऊत म्हणाले.
राज्यातील वातावरण सरकारच्या विरोधात
राज्यातील वातावरण सध्याच्या सरकारला अनुकूल नसल्याचे संजय राऊत म्हणाले. त्यामुळं आम्ही कसबा आणि चिंचवड या दोन्ही ठिकाणी निवडणूक लढवणार आहोत. विधानपरिषदेच्या निकालावरुन सरकार विरोधात असणारं वातावरण दिसून आल्याचे राऊत यावेळी म्हणाले. त्यामुळं कसबा आणि चिंचवड विधानसभेचा निकाल वेगळा लागू शकतो असेही राऊत म्हणाले. या दोन्ही ठिकाणच्या निवडणुका व्हाव्यात ही लोकांची इच्छा आहे. आम्ही सर्वे केला आहे. त्यामुळं या निवडणुका लढवण्याचा महाविकास आघाडीनं निर्णय घेतला आहे. आम्हाला भूमिका स्पष्ट करायच्या असल्याचं संजय राऊत यांनी सांगितलं.
मुख्यमंत्र्यांनी अद्याप आमच्याशी कोणताही संपर्क केलेला नाही : संजय राऊत
मुख्यमंत्र्यांनी जरी आवाहन केलं असेल किंवा राज ठाकरेंनी जरी पत्र लिहलं असेल तरीही कसबा आणि चिंचवडच्या निवडणुका होतीलच, असे संजय राऊत म्हणाले. मुख्यमंत्र्यांनी अद्याप आमच्याशी कोणताही संपर्क केलेला नाही. तसा संपर्क होण्याची शक्यता देखील नसल्याचं राऊतांनी सांगितलं. अंधेरी पोटनिवडणूक हा अपवाद असला तरी तिथे निवडूक झाली होती. पंढरपूरला आणि नांदेडला देखील पोटनिवडणूक झाली होती. तिथे अपवाद पाळला नसल्याचे संजय राऊत म्हणाले.