महाराष्ट्र २४ – ऑनलाईन – पुणे – विशेष प्रतिनिधी – ओमप्रकाश भांगे – करोना संकट आणि संचारबंदीच्या पार्श्वभूमीवर केंद्र सरकारतर्फे पंतप्रधान गरीब कल्याण योजनेअंतर्गत कंपन्यांमध्ये काम करणाऱ्या कर्मचाऱ्यांच्या पीएफ खात्यात २४ टक्के रक्कम जमा करण्यात येत आहे. त्या अंतर्गत पुणे विभागातील तीन हजार ९५३ कंपन्यांतील ४९ हजार १२९ कर्मचाऱ्यांच्या पीएफ खात्यामध्ये एकूण ८ कोटी ४३ लाख ४६ हजार ३७७ रुपये जमा करण्यात आले आहेत. ही रक्कम मार्च आणि एप्रिल महिन्यासाठीची आहे.
‘पंतप्रधान गरीब कल्याण योजनेअंतर्गत शंभरपेक्षा कमी कर्मचारी आणि ९० टक्के कर्मचाऱ्यांचा पगार १५ हजार रुपयांपेक्षा कमी असलेल्या उद्योगातील कर्मचारी व कंपनीच्या हिश्श्याचा पुढील तीन महिन्यांचा पीएफ भरण्याची घोषणा केली आहे. त्यामुळे आर्थिक अडचणीत सापडलेल्या कंपन्यांना दिलासा मिळत असून, त्यांच्या व कर्मचाऱ्यांच्या वाट्याचा १२-१२ टक्के पीएफ कर्मचाऱ्यांच्या खात्यात केंद्र सरकारतर्फे जमा केला जात आहे,’ अशी माहिती पुणे विभागाचे पीएफ आयुक्त अरुण कुमार यांनी दिली.