पुणेकरांसाठी चिंताजनक बातमी, कोरोनाचा विळखा आणखी घट्ट होताना पाहायला मिळत आहे

महाराष्ट्र २४ – ऑनलाईन – पुणे – विशेष प्रतिनिधी – ओमप्रकाश भांगे – एकट्या पुणे शहरात तब्बल 291 कोरोना रूग्णांची वाढ झाली असून 15 जणांचा मृत्यू झाला आहे.पुणे जिल्ह्यात कोरोनाचा विळखा आणखी घट्ट होताना पाहायला मिळत आहे. शुक्रवारी दिवसभरात सर्वाधिक 358 नवे कोरोनाबधित आढळले. त्यामुळे जिल्ह्याचा एकूण कोरोनाबाधित रुग्णांचा आकडा आता 5167 झाला आहे.  परिणामी कोरोना बळींची संख्या 257 वर पोहोचली आहे. कोरोनाबाधित 2552 रुग्ण बरे होऊन त्यांना डिस्चार्ज देण्यात आला आहे. तर पुणे जिल्ह्यात रुग्णांची संख्या 2212 इतकी आहे.

महाराष्ट्रात आतापर्यंतची एक दिवसांतली सर्वाधिक रुग्णांची वाढ शुक्रवारच्या आकड्यांमधून समोर आली. मुंबई, उपनगरं आणि पुण्यात गेल्या 24 तासांत खूप जास्त कोरोनाग्रस्त आढळले आहेत. दिवसभरात तब्बल 2940 रुग्ण राज्यभरातून वाढले आहेत. त्यातली सर्वाधिक वाढ अर्थातच मुंबईत दिसून आली. राज्यभरात कोरोनाबळींच्या संख्येने दीड हजाराचा टप्पा ओलांडला आहे.

गेल्या 24 तासांत 63 मृत्यू नोंदले गेल्याने कोरोनाबळींची संख्या 1517 वर पोहोचली आहे.राज्य सरकारने शुक्रवारी संध्याकाळी पाठवलेल्या आकडेवारीनुसार, महाराष्ट्रात एकूण रुग्णसंख्या 44582 वर पोहोचली आहे. दिवसभरातल्या 63 कोरोना मृत्यूंपैकी मुंबईत 27 आणि पुण्यात 9 मृत्यूंची नोंद झाली आहे.