महाराष्ट्र २४ – ऑनलाईन – विशेष प्रतिनिधी – ओमप्रकाश भांगे – लंडन : करोनाचे थैमान सुरू असताना अधिकाधिक नागरिकांची चाचणी घेण्याचे आवाहन अनेक देशांसमोर आहे. करोना चाचणी घेतल्यानंतर त्याचे अहवाल येण्यास उशीर होत असल्यामुळे करोना संसर्गाचा धोका वाढत असल्याची चर्चा असताना आता अवघ्या २० मिनिटांत करोनाबाधित ओळखता येणार आहे.
ब्रिटनचे आरोग्यमंत्री मॅट हॅनकॉक यांनी याबाबत माहिती दिली असल्याचे ‘द सन’ने वृत्त दिले आहे. मॅट हॅनकॉक यांनी सांगितले की, स्वॅब चाचणी केल्यानंतर त्याचा अहवाल येण्यास काही दिवसांचा अवधी लागतो. आता मात्र असे होणार नाही. ब्रिटनच्या राष्ट्रीय आरोग्य सेवेच्या कर्मचाऱ्यांची अॅण्टीबॉडी चाचणी करण्यात येणार आहे. पुढील आठवड्यांपासून ही चाचणी करण्यात येणार असल्याचीही माहिती त्यांनी दिली.
अॅण्टीबॉडी चाचणीमध्ये संबंधित व्यक्तीमध्ये करोनाचा संसर्ग आहे का, संसर्गानंतर त्याच्या शरीरात अॅण्टीबॉडी विकसित झाली का, याची माहिती या चाचणीत मिळणार आहे. स्वॅब चाचणीत सध्या या व्यक्तीला करोनाची बाधा आहे का, याची माहिती मिळते.
ब्रिटनच्या आरोग्यमंत्र्यांनी घोषणा केलेली चाचणी ही पूर्वीच्या चाचणीपेक्षा वेगळी आहे. या चाचणीला पीसीआर चाचणी म्हटले जाते. ही चाचणी लॅबमध्येच करण्याची आवश्यकता नाही. या चाचणीचे अवघ्या वीस मिनिटांत निकाल येणार आहेत. करोनाची बाधा झाली असल्याचे आढळल्यानंतर त्या व्यक्तीला आयसोलेशनमध्ये ठेवता येऊ शकेल. क्लिनिकल चाचणी यशस्वी झाली असून ब्रिटनमध्ये मोठ्या प्रमाणावर ही चाचणी करण्यात येणार आहे. गरीब व गरजू नागरिकांची मोफत चाचणी करण्यात येणार आहे.