रेडझोन प्रश्न सोडवण्याच्या नावाखाली नागरीकांची होतेय निव्वळ दिशाभूल?

सामाजिक कार्यकर्ते सचिन काळभोर यांचा आरोप

पिंपरीः पिंपरी चिंचवड महानगरपालिका हद्दीतील निगडी रुपी नगर स्पाईन रोड यमुनानगर स्कीम २१/२२/२३२४२५२६/ तसेच तळवडे चिखली दिघी बोपखेल ह्या भागातील रेड झोन संरक्षण क्षेत्रातील बाधित जागा क्षेत्र कमी करण्यात यावे म्हणून पुणे जिल्हाधिकारी कार्यालय या ठिकाणी आमदार महेश लांडगे यांनी पुणे जिल्हाधिकारी यांच्या सोबत रेड झोन नवीन नकाशा प्रसिद्ध करण्यात यावा म्हणून बैठक घेतली. मात्र वस्तुस्थिती अशी आहे, की सन 2000 ते 2023 पर्यंत पिंपरी-चिंचवड शहरातील रेड झोन प्रश्न सोडविण्यात यावा, म्हणून अनेकवेळा मोर्चा व आंदोलन करण्यात आले रेडझोन संरक्षण क्षेत्रातील बाधित जागा क्षेत्र २००० यार्ड क्षेत्र कमी करुन ५०० मीटर करण्यात यावे, म्हणून मागणी करण्यात येत असून, त्या संदर्भात निर्णय घेतला जात नाही. संरक्षण विभागाच्या देहू ॲम्युनेशन डेपो व दिघी मॅगझिन डेपो या भागातील ‘रेड झोन’ चे मार्किंग झालेले नाही. त्यामुळे रेड झोनची मोजणी करुन नकाशा प्रसिद्ध करण्यासाठी प्रशासनाने कार्यवाही करावी. यासाठी भाजपाचे आमदार महेश लांडगे यांनी पुढाकार घेतला आहे. मात्र या बैठकीची औपचारिका म्हणजे नागरिकांची निव्वळ दिशाभूल करण्याचे काम आमदारांकरवी होत असल्याचा आरोप सामाजिक कार्यकर्ते सचिन काळभोर यांनी केला आहे.

रेड झोन संरक्षण क्षेत्रातील बाधित जागेवर बांधकाम परवानगी देण्यात येत नाही बँक लोन होत नाही तसेच इतर नागरी समस्या निर्माण होत आहे. त्यामुळे रेड झोन संरक्षण क्षेत्रातील बाधित जागेवर बेकादेशीर बांधकाम नियमित करण्यासाठी बैठक घेण्यात यावी तसेच रेड झोन संरक्षण क्षेत्रातील बाधित जागेवर बांधकाम नियमित करण्यासाठी अजित दादा पवार यांनी दिलासा दिला आहे. त्या निर्णयाची अंमलबजावणी करण्यात यावी. तसेच रेडझोन संरक्षण क्षेत्रातील बाधित जागा क्षेत्र कमी करण्यात यावे, अशीही मागणी सामाजिक कार्यकर्ते सचिन काळभोर यांनी केलेली आहे.