✍️ महाराष्ट्र २४ | विशेष प्रतिनिधी | दिनांक १४ डिसेंबर २०२५ | सोन्या-चांदीचे दर विक्रमी पातळीवर पोहोचल्याने गुंतवणूकदार संभ्रमात आहेत. चांदीने किलोमागे २ लाखांचा टप्पा पार केला असून सोनं १० ग्रॅमला १.३५ लाखांवर पोहोचलं आहे. जागतिक अस्थिरता, व्याजदर कपात आणि वाढती औद्योगिक मागणी यामुळे ही तेजी दिसून येत आहे.
सध्या सोने-चांदी गुणोत्तर (Gold–Silver Ratio) ६८ वर आहे, जे २०२१ नंतरचे नीचांकी स्तर आहे. ८०/५० च्या नियमांनुसार, गुणोत्तर ८० च्या वर असेल तर चांदी खरेदी योग्य, तर ५० च्या खाली असेल तर सोनं स्वस्त मानलं जातं. सध्या हे गुणोत्तर मधल्या टप्प्यावर असल्याने घाईने खरेदी किंवा विक्री टाळण्याचा सल्ला दिला जातो.
चांदीत औद्योगिक वापर (ईव्ही, सौरऊर्जा, इलेक्ट्रॉनिक्स) वाढल्यामुळे पुढील काळात २०–३०% तेजीची शक्यता वर्तवली जात आहे. मात्र त्याचवेळी चांदीत ७–१०% घसरणीचे चढ-उतारही संभवतात. सोन्यालाही मध्यवर्ती बँकांच्या खरेदीमुळे आधार मिळत आहे.
म्हणूनच, गुंतवणूकदारांनी दीर्घकालीन दृष्टीकोन ठेवावा, कर्ज काढून गुंतवणूक टाळावी आणि ETF किंवा म्युच्युअल फंडांच्या माध्यमातूनच सोने-चांदीत गुंतवणूक करावी. पोर्टफोलिओसाठी विम्याचे कवच म्हणून या धातूंकडे पाहणेच सध्या शहाणपणाचे ठरेल.