महाराष्ट्र 24 | विशेष प्रतिनिधी | दि. ७ फेब्रुवारी २०२६ || Maharashtra Weather Update : फेब्रुवारी महिना म्हणावा तर थंडीची आठवण, पण मुंबईत सध्या आठवण उरलीय ती फक्त स्वेटरची! सकाळी उठताच घाम, दुपारी सूर्याची तिरपी नजर आणि संध्याकाळीही उकाड्याची पाठ सोडत नसलेली सावली—असं विचित्र हवामान मुंबईकर अनुभवत आहेत. कालपर्यंत बोचरी थंडी, आज मात्र अंगाची लाही लाही. पूर्वेकडून येणारे उष्ण व दमट वारे आणि समुद्रावरून येणाऱ्या थंड वाऱ्यांची दिरंगाई, या दोघांनी मिळून शहरात उकाड्याचा ‘संयुक्त मोर्चा’ काढला आहे. सलग तीन दिवस कमाल तापमान ३५ अंशांच्या घरात—हिवाळा गेला कुठे, आणि उन्हाळा आला कधी, हे कळायच्या आत मुंबईकर मात्र मधेच भाजले जात आहेत.
डिसेंबरच्या शेवटी अंगात शिरलेली थंडी आणि जानेवारीच्या सुरुवातीला वाढलेला गारठा आता जणू आठवणींच्या कपाटात बंद झाला आहे. वाऱ्यांची दिशा बदलली, आणि हवामानानेही आपली भूमिका बदलली. सकाळपासूनच सूर्य आग ओकत असल्याने दुपारपर्यंत दमछाक होतेय. समुद्री वारे वेळेवर न आल्याने शहरात उकाडा अडकून पडतोय. त्यातच हवेत प्रदूषणाची भर—श्वास घ्यावा तर जड, आणि सावलीत बसावं तर घाम. एप्रिल-मे आधीच पाऱ्याची अशी चढाओढ सुरू असेल, तर पुढच्या महिन्यांत काय वाढून ठेवलंय, हा प्रश्न प्रत्येकाच्या कपाळावर उमटलेला दिसतो.
दरम्यान, देशाच्या इतर भागांत हवामान मात्र वेगळाच डाव खेळतंय. उत्तरेत पाऊस, बर्फवृष्टी, धुके आणि सोसाट्याचे वारे—हवामानाने जणू सगळ्या ऋतूंना एकत्र मैदानात उतरवलं आहे. पुढील काही दिवसांत अनेक राज्यांत अवकाळी पावसाचा इशारा देण्यात आला आहे. काही ठिकाणी बर्फ, काही ठिकाणी मुसळधार पाऊस, तर काही ठिकाणी दाट धुके—निसर्गाचा हा गोंधळ मानवनिर्मित अस्वस्थतेला अधिक धार देतोय. मुंबईकर मात्र सध्या दुहेरी कोंडीत सापडलेत—कालपर्यंत प्रदूषण, आज उष्णता! त्यामुळे टोपी, गॉगल, स्कार्फ हे आता फॅशन नाही, तर गरज बनली आहे. हवामानाचा हा बदल फक्त तापमानाचा नाही, तर माणसाच्या सहनशक्तीचीही कसोटी घेतोय.