महाराष्ट्र 24 | विशेष प्रतिनिधी | दि. ७ फेब्रुवारी २०२६ || समृद्धी महामार्ग म्हणजे वेग, अंतर मिटवणारी गती आणि वेळेची बचत—पण येत्या काही दिवसांत हाच महामार्ग वाहनचालकांना थांबायला भाग पाडणार आहे. बुलढाणा आणि जालना जिल्ह्यात ‘हायवे ट्रॅफिक मॅनेजमेंट सिस्टम’अंतर्गत गॅन्ट्री उभारणीचे काम सुरू होत असून, ९ ते १८ फेब्रुवारीदरम्यान तब्बल नऊ दिवस टप्प्याटप्प्याने वाहतूक ब्लॉक घेतले जाणार आहेत. नागपूर ते मुंबई अशी धाव घेणाऱ्या वाहनांना काही काळासाठी थांबावे लागणार, तर काहींना पर्यायी मार्गांचा आधार घ्यावा लागणार आहे. वेगाच्या महामार्गावर अचानक लागलेले हे ब्रेक अपघाती नसून, भविष्यातील अधिक शिस्तबद्ध आणि सुरक्षित प्रवासासाठीचा ‘आवश्यक थांबा’ असल्याचे सांगितले जात आहे.
किमी ३०० ते ३६५ या पट्ट्यात, लोणार, सिंदखेडराजा, देऊळगावराजा आणि जालना तालुक्याच्या हद्दीत गॅन्ट्री उभारल्या जाणार आहेत. या कामासाठी २१ टप्प्यांत वाहतूक नियंत्रित केली जाणार असून, प्रत्येक टप्प्यात संबंधित वाहिनीवरील वाहतूक ४५ ते ६० मिनिटांसाठी पूर्णतः बंद राहणार आहे. कधी मुंबईकडे जाणारी वाहिनी, तर कधी नागपूरकडे जाणारी—असा हा ब्लॉकचा खेळ दिवसागणिक बदलत राहणार आहे. दुपारी १२ ते १ आणि ३ ते ४ या वेळेत प्रामुख्याने वाहतूक थांबवली जाणार असल्याने, दीर्घ प्रवास करणाऱ्यांनी घड्याळासोबत संयमही सोबत ठेवावा लागणार आहे. काम पूर्ण होताच वाहतूक पूर्ववत केली जाईल, असे स्पष्ट करण्यात आले असले, तरी या एका तासाचा परिणाम अनेक तासांच्या प्रवासयोजनांवर होऊ शकतो.
मात्र हा त्रास तात्पुरता आहे आणि उद्देश दीर्घकालीन आहे. गॅन्ट्री बसवल्यानंतर महामार्गावर वाहतुकीचे डिजिटल निरीक्षण, वेग नियंत्रण, अपघात व्यवस्थापन आणि आपत्कालीन प्रतिसाद अधिक प्रभावी होणार आहे. आजचा थांबा म्हणजे उद्याचा सुरक्षित वेग—हीच या ब्लॉकमागची भूमिका आहे. तरीही, प्रत्यक्ष रस्त्यावर मात्र वाहनचालकांची कुजबुज, वेळेची घाई आणि नियोजनाचा गोंधळ दिसून येण्याची शक्यता नाकारता येत नाही. त्यामुळे या नऊ दिवसांत समृद्धी महामार्गावर धाव घेणाऱ्यांनी ‘वेग’ कमी आणि ‘शहाणपण’ जास्त वापरणे गरजेचे आहे. कारण कधी कधी थांबणंही प्रवासाचाच एक भाग असतो—फक्त तो समजून घ्यायला