✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ३१ मार्च २०२६ ।। वॉशिंग्टन : मध्यपूर्वेतील तणाव आता निर्णायक टप्प्यावर पोहोचला असून अमेरिकेचे राष्ट्राध्यक्ष डोनाल्ड ट्रम्प यांनी इराणला थेट आणि कठोर इशारा दिला आहे. ‘होर्मुझची सामुद्रधुनी’ तात्काळ व्यापारासाठी खुली केली नाही, तर इराणमधील तेल विहिरी, वीज प्रकल्प आणि खार्ग बेटासारख्या महत्त्वाच्या पायाभूत सुविधांवर हल्ले करून त्यांना पूर्णपणे उद्ध्वस्त केले जाईल, असा इशारा ट्रम्प यांनी दिला आहे. एका बाजूला कराराचे संकेत देत असतानाच दुसऱ्या बाजूला लष्करी कारवाईची भाषा वापरल्यामुळे या संघर्षाची तीव्रता अधिकच वाढली आहे.
सोशल मीडियावरून दिलेल्या संदेशात ट्रम्प यांनी स्पष्ट शब्दांत म्हटले आहे की, “लवकरच करार झाला नाही, तर आम्ही इराणमधील सर्व प्रमुख प्रकल्प संपवू.” त्यांनी पुढे असा दावा केला की, अमेरिकेने आतापर्यंत जाणीवपूर्वक काही ठिकाणी कारवाई टाळली होती; मात्र आता परिस्थिती बदलल्यास कठोर पावले उचलली जातील. गेल्या अनेक दशकांतील संघर्षाचा ‘सूड’ म्हणून ही कारवाई असेल, असेही त्यांनी सूचित केले. या वक्तव्यामुळे आधीच तणावग्रस्त असलेल्या वातावरणात आणखी खळबळ उडाली आहे.
दरम्यान, या युद्धाला आता महिनाभराचा कालावधी पूर्ण झाला असून आतापर्यंत ३ हजारांहून अधिक जणांचा मृत्यू झाल्याची माहिती समोर आली आहे. इराणने ‘होर्मुझ’वर नियंत्रण मिळवल्यामुळे जागतिक तेल पुरवठ्यावर मोठा परिणाम झाला आहे. जगातील जवळपास २० टक्के तेल वाहतूक या मार्गावरून होत असल्याने आंतरराष्ट्रीय बाजारपेठ हादरली आहे. त्यातच हुथी बंडखोरांच्या सहभागामुळे लाल समुद्रातील ‘बाब अल-मंदेब’ जलमार्गावरही धोका निर्माण झाला आहे. एकूणच, या संघर्षामुळे जागतिक अर्थव्यवस्था, तेल दर आणि सुरक्षेवर गंभीर परिणाम होण्याची भीती व्यक्त केली जात आहे.