Ashok Kharat: 💣 ‘भक्ती’च्या नावाखाली कोट्यवधींचा खेळ! १०० बोगस खात्यांनी उघड केला भोंदूचा काळा चेहरा

✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ४ एप्रिल २०२६ ।। नाशिकमध्ये श्रद्धा आणि विश्वासाला तडा देणारा धक्कादायक प्रकार समोर आला आहे. अंकशास्त्राच्या नावाखाली लोकांना जाळ्यात ओढणारा अशोक खरात याचा आणखी एक मोठा घोटाळा उघड झाला आहे. भक्तांकडून आधार आणि पॅन कार्ड घेत, त्याच कागदपत्रांच्या आधारे त्याने तब्बल १०० हून अधिक बोगस खाती उघडल्याची माहिती समोर आली आहे. या प्रकारामुळे ‘भक्ती’च्या आड सुरू असलेल्या आर्थिक गैरव्यवहारांचा मोठा पर्दाफाश झाला आहे.

या सर्व खाती समता पतसंस्था आणि जयदंबा माता पतसंस्था याठिकाणी उघडण्यात आली. विशेष म्हणजे या खात्यांवर वारसदार म्हणून स्वतः खरातचेच नाव नमूद करण्यात आले होते. त्यामुळे काळ्या पैशांची विल्हेवाट लावण्यासाठी हा संपूर्ण खेळ रचला असल्याचा संशय पोलिसांना आहे. या उघडकीनंतर दोन्ही पतसंस्था तपासाच्या भोवऱ्यात सापडल्या असून आर्थिक व्यवहारांची बारकाईने चौकशी सुरू आहे.

तपासादरम्यान अनेक धक्कादायक बाबी समोर येत आहेत. काही सामान्य भक्तांसह काही प्रभावशाली व्यक्तींची नावेही या प्रकरणात पुढे येत आहेत. राजेंद्र जासूद, दिनेश परब तसेच नामकरण आवारे यांच्या कुटुंबीयांच्या नावानेही अनेक खाती उघडण्यात आल्याचे निष्पन्न झाले आहे. एवढंच नाही तर रुपाली चाकणकर यांच्या बहिणीच्या नावानेही खाते उघडल्याची बाब समोर आली आहे, ज्यामुळे या प्रकरणाची व्याप्ती अधिकच वाढली आहे.

या खात्यांमधून तब्बल १०० कोटी रुपयांहून अधिक व्यवहार झाल्याचा संशय असून सर्व खाती स्वतः खरातच हाताळत होता. सर्व खात्यांना एकच मोबाईल नंबर लिंक असल्याने संशय अधिक बळावला आहे. सध्या एसआयटीकडून दोन्ही पतसंस्थांच्या चेअरमन आणि व्यवस्थापकांची चौकशी सुरू असून, या प्रकरणात आणखी मोठे खुलासे होण्याची शक्यता आहे.