Nashik Crime : 🚨 ‘खरात पार्ट 2’चा थरकाप उडवणारा खुलासा! 121 महिलांचं शोषण, अश्लील व्हिडिओंचा काळाबाजार?

✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ४ एप्रिल २०२६ ।। नाशिक पुन्हा एकदा हादरलं आहे. भोंदूबाबा अशोक खरात प्रकरण गाजत असतानाच आता आणखी एक गंभीर आणि संतापजनक प्रकरण समोर आलं आहे. सातपूर परिसरातील एका व्यावसायिक आणि NGO चालकाशी संबंधित ‘खरात पार्ट 2’ म्हणून ओळखलं जात असलेलं हे प्रकरण राज्यभर खळबळ उडवणारं ठरत आहे. तब्बल 121 महिलांचं लैंगिक शोषण झाल्याची धक्कादायक माहिती समोर आली असून, या प्रकरणाने समाजमन सुन्न झालं आहे.

या प्रकरणाचा धागा एका चोरीच्या घटनेतून सापडला. नाशिक मधील सातपूर येथे एका व्यावसायिकाचा टॅब चोरीला गेला. त्यातून 200 हून अधिक अश्लील व्हिडिओ सापडले आणि पोलिसांच्या संशयाला सुरुवात झाली. तपास वाढवत नेल्यानंतर महिलांना पुढे येण्याचं आवाहन करण्यात आलं आणि अखेर एका पीडितेने धाडस दाखवत तक्रार दाखल केली. त्यानंतर या प्रकरणाचा भयानक चेहरा उघड झाला.

या प्रकरणात संशयित म्हणून रवींद्र एरंडे (वय 63) याला पोलिसांनी ताब्यात घेतलं आहे. प्राथमिक तपासात समोर आलं की, गरजू महिलांना नोकरीचं आमिष दाखवून त्यांचं शोषण केलं जात होतं. नाशिक आणि इगतपुरीतील हॉटेल्समध्ये अत्याचार करून त्याचं गुप्त चित्रीकरण केलं जायचं. त्यानंतर या व्हिडिओंच्या आधारे महिलांना ब्लॅकमेल केलं जात असल्याचा संशय आहे. इतकंच नाही, तर हे व्हिडिओ ‘ब्लू फिल्म’ स्वरूपात विकले जात असल्याचाही तपास सुरू आहे.

पोलिसांनी आतापर्यंत 4 मोबाईल, 2 पेनड्राईव्ह आणि 1 मेमरी कार्ड जप्त केलं आहे. टॅबमध्ये सापडलेल्या 87 आक्षेपार्ह व्हिडिओंनी या घोटाळ्याची व्याप्ती स्पष्ट केली आहे. पीडितांमध्ये अंगणवाडी सेविका, आशा वर्कर्स, कंपनी कामगार आणि घरकाम करणाऱ्या महिलांचा समावेश असल्याने हा प्रकार किती खोलवर पसरला होता याची कल्पना येते.

या प्रकरणात बलात्कार आणि ॲट्रॉसिटी कायद्यांतर्गत गुन्हे दाखल करण्यात आले असून पोलिसांकडून सखोल तपास सुरू आहे. आणखी पीडित महिला पुढे येण्याची शक्यता व्यक्त केली जात आहे. ‘भक्ती’ आणि ‘सेवा’च्या नावाखाली सुरू असलेल्या या घाणेरड्या जाळ्याने समाजाला हादरवून सोडलं आहे. आता या प्रकरणातून आणखी कोणते धक्कादायक खुलासे समोर येतात, याकडे संपूर्ण राज्याचं लक्ष लागलं आहे.