अमृत भारत योजनेतून रेल्वे स्थानकाचा आधुनिक अवतार; एस्कलेटर, लिफ्ट, एलईडी सुविधा पाहून प्रवासीही थक्क
महाराष्ट्र २४ ।। ऑनलाईन ।। विशेष प्रतिनिधी ।। दि. २८ मे २०२६ ।। कधीकाळी गर्दी, गोंधळ, धुळीचे ढग आणि फुटकळ सोयींमुळे प्रवाशांचा संयम तपासणारे आकुर्डी रेल्वे स्थानक आता अक्षरशः नववधूप्रमाणे सजू लागले आहे. रेल्वे मंत्रालयाच्या अमृत भारत योजनेतून सुरू असलेल्या या कायापालटामुळे आकुर्डी स्टेशनने जुनी कात टाकून आधुनिकतेचा झगमगता पोशाख परिधान केला आहे. पुणे-लोणावळा उपनगरीय मार्गावरील महत्त्वाचे केंद्र असलेल्या या स्थानकाकडे आता फक्त प्रवासासाठी नव्हे, तर “हे खरंच रेल्वे स्टेशन आहे का?” अशी उत्सुक नजर वळू लागली आहे. कारण स्टेशनवर पाय ठेवताच प्रवाशांचे स्वागत आता गंजलेल्या लोखंडी खांबांनी नव्हे, तर एलईडी स्क्रीन, सरकते जिने आणि आकर्षक प्रवेशद्वारांनी होणार आहे.
पिंपरी-चिंचवडच्या वाढत्या विस्ताराबरोबर रेल्वे प्रवाशांची संख्या प्रचंड वाढली; पण सुविधा मात्र जुन्याच चाकोरीत अडकलेल्या होत्या. दररोज हजारो प्रवासी गर्दीत श्वास गुदमरवत प्रवास करत होते. आता मात्र चित्र बदलताना दिसत आहे. मुख्य प्रवेशद्वारासोबत दोन्ही बाजूंना उपप्रवेशद्वार उभारण्यात आले असून, गर्दीचे व्यवस्थापन अधिक सुलभ होणार आहे. ज्येष्ठ नागरिक, दिव्यांग आणि महिलांसाठी स्वतंत्र रॅम्पची व्यवस्था करण्यात आली आहे. “रेल्वे स्टेशन म्हणजे फक्त प्लॅटफॉर्म आणि तिकीटखिडकी” ही जुनी मानसिकता मोडीत काढत आकुर्डी स्टेशन आता छोटेखानी विमानतळाची अनुभूती देऊ लागले आहे. वाहनांसाठी आकर्षक “पे अँड पार्क” सुविधा, आच्छादित पार्किंग आणि इलेक्ट्रॉनिक दिशादर्शक फलक यामुळे प्रवाशांचा वेळ आणि त्रास दोन्ही वाचणार आहेत.
फलाटांवरही बदलाचा झगमगता स्पर्श दिसू लागला आहे. दोनही प्लॅटफॉर्मवर आधुनिक लिफ्ट, एस्कलेटर, पिण्याच्या पाण्याची सुसज्ज व्यवस्था, वातानुकूलित प्रतीक्षागृह, आरामदायी आसनव्यवस्था आणि स्वच्छतागृहांची उभारणी करण्यात आली आहे. पूर्वी पंखा सुरू आहे की बंद, हे ओळखण्यासाठीच प्रवाशांना वर पाहावं लागायचं; आता मात्र नवीन पंखे, एलईडी फलक आणि रंगीत सजावट स्टेशनला वेगळंच रूप देत आहेत. रेल्वे प्रशासनाने स्टेशन केवळ “दिसायला सुंदर” बनवण्यापेक्षा “प्रवाशांसाठी उपयुक्त” करण्यावर भर दिला आहे, हे स्पष्टपणे जाणवत आहे. त्यामुळे रोजच्या धावपळीत रेल्वे पकडणाऱ्या नोकरदार, विद्यार्थी आणि महिलांसाठी हा बदल मोठा दिलासा ठरणार आहे.
या बदलामागे फक्त सौंदर्यीकरण नाही, तर भविष्यातील मोठं रेल्वे नियोजन दडलं आहे. कर्जत ते पनवेल ट्रॅकचे काम वेगाने सुरू असून भविष्यात पुणे ते नवी मुंबई उपनगरीय सेवा सुरू होण्याची शक्यता बळावली आहे. त्यामुळे मुंबई-पुणे प्रवासावरील ताण कमी होणार असून उपनगरीय रेल्वेची नवी क्रांती घडू शकते. आकुर्डी, चिंचवड, पिंपरी, देहूरोड आणि तळेगाव ही स्थानकेही याच धर्तीवर विकसित होत आहेत. त्यामुळे रेल्वेचा प्रवास हा केवळ गरज राहणार नाही, तर सुखद अनुभव ठरण्याच्या दिशेने पाऊल टाकलं जात आहे. आणि म्हणूनच आकुर्डी स्टेशनचा हा बदल फक्त बांधकामाचा नाही, तर बदलत्या शहराच्या नव्या स्वप्नांचा आरसा ठरत आहे.