महाराष्ट्र २४ । विशेष प्रतिनिधी । दि. २ जुलै । रुपयाच्या मुल्यात सातत्याने पडझड होत आहे. डॉलरच्या तुलनेत रुपयांचं मुल्य मागील दोन महिन्यांच्या निचांकी स्तरावर आहे. कच्चा तेलाची किंमत सातत्याने वाढत आहे. दुसरीकडे शेअर बाजारात पडझड होतेय. याच दरम्यान डॉलरच्या तुलनेत सलग तिसऱ्या दिवशी रुपयाचं अवमुल्यन झालंय. रुपयाच्या मुल्यात 23 पैशांची घट होऊन प्रति डॉलर 74.55 झाला (Value of Rupees sliping by 23 paisa against dollar reached at low of 2 months).
बाजारात रुपयाची सुरुवात पडझडीसह 74.37 वर झाली. मागील सत्रात ही किंमत 74.32 रुपये प्रति डॉलर होती. दिवसभरात रुपयाच्या किमतीत 74.34 ते 74.63 रुपये प्रति डॉलर या दरम्यान चढउतार होत राहिले. अखेर रुपया मागील व्यापारी सत्राच्या तुलनेत रुपयाची 23 पैशांनी घट होऊन 74.55 प्रति डॉलरवर बाजार बंद झाला. 27 एप्रिलनंतरची ही सर्वात कमी किंमत आहे. मागील 3 दिवसात रुपयात जवळपास 36 पैशांची घट झालीय.
डॉलर सलग सातव्या दिवशी वधारलाय. सध्या डॉलर +0.022 च्या वाढीसह 92.453 च्या स्तरावर पोहचलाय. ही इंडेक्स जगातील 6 प्रमुख चलनांच्या तुलनेत डॉलरला मजबूत दाखवत आहे. गुरुवारी (1 जुलै) सलग चौथ्या दिवशी कच्च्या तेलाच्या किमतीत वाढ झालीय. सध्या आंतरराष्ट्रीय बाजारात 1.11 डॉलरच्या वाढीसह कच्च्या तेलाची किंमत 75.73 डॉलर प्रति बॅरलवर पोहचलीय.