महाराष्ट्र २४ । विशेष प्रतिनिधी । दि.१० मार्च । ‘महाराष्ट्र दुकाने व आस्थापना’ अधिनियमातील पळवाटीचा फायदा घेऊन दहापेक्षा कमी कामगार असलेल्या दुकानांकडून मराठी पाटय़ा लावण्यास विरोध दर्शवला जात ह2ाsता. याला चाप लावण्यासाठी कायद्यात सुधारणा करणारे विधेयक विधिमंडळाच्या दोन्ही सभागृहांत मंजूर करण्यात आले. राज्यपालांच्या स्वाक्षरीनंतर याचे कायद्यात रूपांतर होणार असून आता दुकान किंवा आस्थापना मोठे असो वा छोटे, त्यावर मराठी पाटी लावायलाच हवी अशी सुधारणा या विधेयकात करण्यात आली आहे.
‘महाराष्ट्र दुकाने व आस्थापना’ अधिनियम 2017 मध्ये ही महत्त्वाची सुधारणा करण्यात आली आहे. याआधी दहापेक्षा कमी कामगार असलेल्या आस्थापना व दुकान नियमातून पळवाट काढत असल्याचे आढळून आले होते. ही पळवाट काढून टाकण्याबाबत मंत्रिमंडळ बैठकीत निर्णय घेतल्यानंतर आज याविषयीचे विधेयक महाविकास आघाडी सरकारने दोन्ही सभागृहांत मांडून त्यावर मंजुरीची मोहोर उमटवली.
मद्यविक्री व मद्यपान सेवा पुरविणाऱया दुकानांना दणका
राज्यातील मद्यविक्री आणि मद्यपान सेवा पुरविणाऱयांची दुकानांची नावे ही महापुरुषांच्या नावावर असल्याचे दिसून येतात. तर अनेकांनी गडकिल्ल्यांची नावेदेखील त्यांच्या दुकानांना दिली आहेत. या सर्व दुकानांना दणका देत मद्यविक्री व मद्यपान सेवा पुरविणाऱया दुकानांची नावे ही महापुरुष/महनीय महिला यांची किंवा गडकिल्ल्यांची असू नयेत, असेही या विधेयकात नमूद करण्यात आले आहे.
मराठी लहान अक्षरात लिहिता येणार नाही
बहुसंख्य दुकाने व व्यापारी पेढय़ांमध्ये दहापेक्षा कमी कामगार असतात हे लक्षात घेता यापुढे रस्त्यालगतच्या सर्वच दुकांनावरील पाटय़ा मराठीत लागलेल्या दिसतील. मराठीत-देवनागरी लिपीतील अक्षरे दुसऱया (इंग्रजी किंवा अन्य) लिपीतील अक्षरांपेक्षा लहान ठेवता येणार नाहीत, अशीही दुरुस्ती या विधेयकात करण्यात आली आहे. यामुळे आता राज्यातील सर्व दुकानांवर मराठी भाषेतील पाटय़ा झळकतील असे सांगताना विधिमंडळातील या विधेयकाच्या मंजुरीबद्दल मराठी भाषामंत्री सुभाष देसाई यांनी आनंद व्यक्त केला. दुकानांच्या नामफलकावर सुरुवातीला मराठी अक्षरातच दुकानाचे नाव लिहिलेले असावे. मराठी अक्षराचा आकार हा अन्य कोणत्याही भाषेच्या आकारापेक्षा कमी असता कामा नये. नामफलकावर सुरुवातीला मराठी मोठय़ा अक्षरात असेल तर त्या शेजारी अन्य कोणत्याही भाषेत नाव लिहिण्यास मनाई करण्यात आलेली नाही.