महाराष्ट्र २४ । विशेष प्रतिनिधी । दि .३ मे । राष्ट्रवादी काँग्रेसचे अध्यक्ष शरद पवार यांनी आज ( २ मे ) मोठी घोषणा केली आहे. राष्ट्रवादी काँग्रेसच्या अध्यक्षपदावरून निवृत्त होणार असल्याचं शरद पवार यांनी जाहीर केलं. मुंबईतील यशवंतराव चव्हाण सभागृहात ‘लोक माझे सांगाती’ पुस्तकाच्या विस्तारित आवृत्तीच्या प्रकाशन सोहळ्यात शरद पवारांनी हा निर्णय घेतला. या निर्णयानंतर राजकीय स्तरातून विविध प्रतिक्रिया उमटत आहे. केंद्रीय मंत्री नारायण राणे यांनीही यावर भाष्य केलं आहे.
शरद पवार नेमकं काय म्हणाले?
“१९९९ साली राष्ट्रवादी काँग्रेसची स्थापना झाली. तेव्हापासून गेली २४ वर्षे राष्ट्रवादी पक्षाचा अध्यक्ष म्हणून काम पाहतोय. सार्वजनिक जीवनातील १ मे १९६० पासून सुरू झालेला, हा प्रवास गेली ६३ वर्षे अविरत सुरू आहे. त्यापैकी ५६ वर्षे मी कुठल्या ना कुठल्या सभागृहाचा सदस्य म्हणून सातत्याने काम करत आहे. संसदेतील राज्यसभा सदस्यपदाची पुढील ३ वर्ष शिल्लक आहेत. या काळात राज्याच्या आणि देशाच्या प्रश्नांमध्ये अधिकाधिक लक्ष घालणाऱ्यावर माझा भर असेल,” असं शरद पवारांनी नमूद केलं.
“सार्वजनिक जीवनातील १ मे १९६० ते १ मे २०२३ इतक्या प्रदीर्घ कालावधीनंतर आता कुठेतरी थांबवण्याचा विचार करणे आवश्यक आहे. त्यामुळे मी राष्ट्रवादी काँग्रेस पक्षाच्या अध्यक्षपदावरून निवृत्त होण्याचा निर्णय घेतला आहे,” असं शरद पवारांनी सांगितलं.
माननीय शरद पवार साहेब, आपण राजकारणातही हवेत आणि राष्ट्रवादी काँग्रेसच्या अध्यक्षपदी सुध्‍दा हवेत !@PawarSpeaks
— Narayan Rane (@MeNarayanRane) May 2, 2023
“आपण राजकारणातही हवेत अन्…”
निवृत्तीच्या निर्णयानंतर केंद्रीय मंत्री नारायण राणे यांनी शरद पवारचं अध्यक्ष असावेत, असं मत व्यक्त केलं आहे. ट्वीट करत नारायण राणे म्हणाले की, “शरद पवार साहेब, आपण राजकारणातही हवेत आणि राष्ट्रवादी काँग्रेसच्या अध्यक्षपदी सुद्धा हवेत,” असं नारायण राणेंनी म्हटलं.