महाराष्ट्र २४ । विशेष प्रतिनिधी । दि. २० जुलै । पिंपरी-चिंचवड शहरातील अंतर्गत रस्त्यांची चाळण झाली असून खड्डेच-खड्डे पडले आहेत. मात्र, महापालिकेने शहरात केवळ ३१९ खड्डे असल्याचा दावा केला आहे. त्यामुळे पावसाळ्यापूर्वी खड्डे बुजविण्याचा पालिकेचा दावा फोल ठरला आहे.
शहरातील निगडी, भोसरी, नवी सांगवी, जुनी सांगवी, वाकड, थेरगाव, चिंचवड, चिखली, आकुर्डी परिसरातील रस्त्यांवर खड्डे पडले आहेत. विविध भागात १ जूनपूर्वी ४६७ खड्डे होते. तर, १ जून ते १० जुलैपर्यंत १ हजार ६१९ खड्डे पडले आहेत. पावसाळ्यापूर्वीचे आणि नंतर असे शहरात २ हजार ८६ खड्डे होते. यामधील १ हजार ७६७ खड्डे डांबर, कोल्ड मिक्स, मुरूम, खडी, कॉंक्रिट, पेव्हिंग ब्लॉकने बुजविले आहेत. तर, सध्यस्थितीत शहरात केवळ ३१९ खड्डे बुजविण्याचे बाकी असल्याचा दावा महापालिका प्रशासनाने केला आहे. मात्र, शहरातील रस्त्यांवर सर्वत्र खड्डेच-खड्डे दिसून येतात.
काही भागातील खड्डे प्रशासनाने तात्पुरती डागडुजी करत बुजविले आहेत. परंतु, मोठा पाऊस झाल्यास येथे पुन्हा चिखल होणार आणि त्यावरून वाहने गेल्यास पुन्हा खड्डा पडण्याची शक्यता आहे. यामुळे केवळ कागदोपत्री दाखविण्यासाठी ही डागडुजी होत असल्याचा आक्षेप देखील नागरिकांनी घेतला आहे. शहरात २ हजार ८६ खड्डे होते. यापैकी एक हजार ७६७ खड्डे बुजविले. उर्वरित खड्डे बुजविण्याचे काम युध्दपातळीवर सुरू आहे. पावसाळ्यात खड्डे बुजविण्याची प्रक्रिया निरंतर सुरूच राहणार असल्याचे शहर अभियंता मकरंद निकम यांनी सांगितले.